काठमाडाैँ । भिजिट भिसामार्फत विदेश जाने नेपाली नागरिकमध्ये ठूलो हिस्सा समयमै स्वदेश नफर्किएको पाइएको छ। महालेखापरीक्षकको कार्यालयको विसट्ठिऔं वार्षिक प्रतिवेदन (आर्थिक वर्ष २०८३) ले भिजिट भिसा प्रणालीको कार्यान्वयन र निगरानीमा कमजोरी देखिएको औँल्याएको हो।
प्रतिवेदनअनुसार अध्यागमन ऐन, २०४९ ले नेपाली नागरिकको आगमन र प्रस्थान व्यवस्थापनको जिम्मेवारी अध्यागमन विभाग लाई दिएको छ भने सोही व्यवस्था कार्यान्वयनका लागि अध्यागमन कार्यविधि, २०६५ लागू गरिएको छ।
विभागको विवरणअनुसार चालु आर्थिक वर्षमा १ लाख ४९ हजार ७८९ पुरुष र १ लाख ११ हजार ७६२ महिला गरी कुल २ लाख ६१ हजार ५५१ जना नेपाली भिजिट भिसामा विदेश भ्रमणमा गएका छन्।
त्यसैगरी, विभागले मासिक रूपमा १२ जनाको दरले नमुना परीक्षण गर्दा १२ मध्ये ९ जना भ्रमणपछि स्वदेश नफर्किएको देखिएको प्रतिवेदनमा उल्लेख छ। नमुना परीक्षणमा एक व्यक्ति यस आर्थिक वर्षमा दुई पटक तथा सन् २०२० यता युएई, थाइल्याण्ड, सिंगापुर, भारत, चीन र फिलिपिन्सलगायत देशमा १० पटकसम्म गएको समेत पाइएको छ।
प्रतिवेदनले भिजिट भिसामा ठूलो संख्यामा नेपाली विदेश जाने तर फिर्ता हुने दर कमजोर देखिनु चिन्ताजनक भएको उल्लेख गर्दै प्रभावकारी नियमन र निगरानी प्रणाली कडाइ गर्न सुझाव दिएको छ।
