काठमाडौँ। कवि लालमणि पौडेलको पहिलो कविता सङ्ग्रह ‘भावतरङ्ग’ लोकार्पण गरिएको छ ।
सिसार साहित्यिक पत्रिकाले आज यहाँ आयोजना गरेको ‘भावतरङ्ग’ कविता सङ्ग्रह लोकार्पण तथा परिचर्चा कार्यक्रममा नेपाल प्रज्ञा-प्रतिष्ठानका पूर्वसदस्यसचिव प्रा जगतप्रसाद उपाध्याय, समालोचकद्वय केशव सुवेदी र गोपीन्द्र पौडेल, रुरु संस्कृत विद्यापीठ रिडी, गुल्मीका पूर्वप्राचार्य श्रीराम सापकोटालगायतले कतिको लोकार्पण गर्नुभएको हो ।
सङ्ग्रहमा पौडेलका २८ वटा कविता छन् । कार्यक्रममा प्रतिष्ठानका पूर्वसदस्यसचिव उपाध्यायले नेपाल संस्कृत विश्वविद्यालयको लेखा समूहको सेवामा रहनुभएका पौडेलले ‘भावतरङ्ग’ कविता सङ्ग्रह रचना गर्नुभएकामा बधाई दिनुभयो ।
साहित्यको मुख्य उद्देश्य बहुजन हितायअनुसार कविता कृति त्यसमा सफल रहेको उहाँले सुनाउनुभयो । साहित्यका माध्यमबाट धर्म, अर्थ, काम र मोक्ष चारै पुरुषार्थ पूरा हुने संस्कृत विश्वविद्यालयका पूर्वकुलसचिवसमेत रहनुभएका उपाध्यायले बताउनुभयो ।
कृतिकार पौडेलले पत्रपत्रिकामा स्तम्भलेखन गर्दागर्दै आफू साहित्यलेखनतर्फ आकर्षित भएको सुनाउनुभयो । जीवनमा देखे, भोगेका समसामयिक विषलाई आफूले कविता कृतिमा समेटेको जानकारी पनि उहाँले दिनुभयो ।
रुरु संस्कृत विद्यापीड रिडी गुल्मीका पूर्वप्राचार्य श्रीराम सापकोटाले रुरु क्षेत्रको धार्मिक, सांस्कृतिक परिवेशलाई केन्द्रबिन्दुमा राखेर कविता कृति लेखिएको पाउँदा खुसी लागेको बताउनुभयो ।
कविता कृतिमाथि समीक्षा गर्दै प्रा केशव सुवेदीले प्रेम, प्रणय, वात्सल्य, योग, आयुर्वेद, कोरोना महामारी, युगीन सामाजिक व्यङ्ग्यलगायत विषयमा लेखिएका कविता मर्मस्पर्शी रहेका जानकारी गराउनुभयो । कविताको अध्ययनबाट कविले जीवन र समाजले राम्रोसँग बुझ्नुभएको प्रष्ट हुने बताउनुभयो ।
सिसार साहित्यिक पत्रिकाका प्रधान सम्पादक ज्ञाननिष्ठ ज्ञवालीले हृदयस्पर्शी कविता लेख्ने कवि पौडेलका उपन्यासलगायत कृति पनि चाँडै पढ्न पाइने विश्वास व्यक्त गर्नुभयो । संस्कृत विश्वविद्यालयको सेवामा रहनुभएको बेलादेखि कवि पौडेलले रचनात्मक गतिविधिमा पनि रुचि देखाएकाले कृति ल्याउन सफल हुनुभएको उहाँले उल्लेख गर्नुभयो ।
कार्यक्रममा समालोचक गोपीन्द्र पौडेल, कृतिका प्रकाशक कमला पौडेल, वाल्मीकि विद्यापीठका प्राचार्य अच्युतप्रसाद लामिछाने, सिसार साहित्यिक पत्रिकाका अध्यक्ष मीनप्रसाद ज्ञवाली, मेघराज पौडेल, विजयराज न्यौपानेलगायत साहित्यकारले कविको पहिलो कृतिले पाठकको ध्यानाकर्षण गर्न सफल भएकाले लेखनलाई प्राथमिकताका साथ अघि बढाउनुपर्नेमा जोड दिनुभयो । रासस
