काठमाडौं । राष्ट्रिय प्रजातन्त्र पार्टी (राप्रपा) ले मधेस प्रदेशसभामा रिक्त रहेको समानुपातिक प्रदेशसभा सदस्य पदका लागि महोत्तरीकी सरिता कुमारी ठाकुरलाई सिफारिस गरेको छ।
यसअघि प्रदेशसभा सदस्य रहेकी कञ्चन बिच्छालाई पार्टीले गम्भीर अनुशासन उल्लङ्घन गरेको आरोपमा सांसद पदबाट फिर्ता बोलाउँदै कारबाही गरेको थियो। पार्टी निर्णयविपरीत प्रदेश सरकारमा मन्त्री बनेपछि उनी कारबाहीमा परेकी थिइन्।
बिच्छाले उक्त निर्णयविरुद्ध अदालतमा रिट दायर गरेकी थिइन्। तर अदालतले समेत उनको रिट खारेज गरेपछि उनी प्रदेशसभा सदस्य पदबाट पदमुक्त भएकी थिइन्।
बिच्छा पदमुक्त भएपछि रिक्त रहेको स्थानमा नयाँ सदस्य सिफारिस गर्न निर्वाचन आयोगबाट पत्र प्राप्त भएको र सोही क्लस्टरको समानुपातिक सूचीमा दोस्रो नम्बरमा रहेकी ठाकुरलाई सिफारिस गरिएको राप्रपाले जनाएको छ।
