काठमाडाैँ । नेपाली कांग्रेसका निवर्तमान कार्यवाहक सभापति पूर्णबहादुर खड्काले हालै केन्द्रीय कार्यसमितिमा गरिएको मनोनयन प्रक्रियाप्रति असन्तुष्टि जनाउँदै पार्टीभित्र बृहत् र एकताको आवश्यकता अझै बढेको बताएका छन्।
खड्काले विभिन्न सञ्चार माध्यममा आएका टिप्पणी तथा पार्टीभित्र फैलिएको भ्रम र जिज्ञासाप्रति आफ्नो गम्भीर ध्यानाकर्षण भएको उल्लेख गर्दै पछिल्ला राजनीतिक छलफलहरूमा उठाएका आफ्ना धारणा सार्वजनिक गरेका हुन्।
उनका अनुसार केही हप्ता अघि गगन थापा र केही दिनअघि गगन थापा तथा विश्वप्रकाश शर्मासँग भएको भेटघाट तथा छलफलका क्रममा उनले देशको राष्ट्रियता ऐतिहासिक रूपमा गम्भीर जोखिममा रहेको, लोकतन्त्र र संविधानवादका आधारमाथि पपुलिज्मको नाममा निरन्तर प्रहार भइरहेको तथा नेपाली कांग्रेस अहिले सबैभन्दा अप्ठ्यारो राजनीतिक परिस्थितिमा उभिएको धारणा राखेका थिए।
खड्काले पार्टीलाई प्रभावकारी र हस्तक्षेपकारी भूमिकामा लैजानका लागि संगठनात्मक र भावनात्मक रूपमा सम्पूर्ण एकता अपरिहार्य रहेको स्पष्ट पारेका छन्। उनका अनुसार पार्टी एकताको नेतृत्व मुख्य रूपमा गगन थापाले गर्नुपर्ने र दोस्रोमा विश्वप्रकाश शर्माको भूमिका रहने उनको सुझाव रहेको छ।
उनले हालै गरिएको केन्द्रीय कार्यसमितिको मनोनयन प्रक्रियाबारे आफूलाई कुनै जानकारी वा परामर्श नभएको भन्दै उक्त निर्णयले पार्टीको बृहत् एकताको उद्देश्यमा चोट पुगेको टिप्पणी गरेका छन्।
खड्काले विगतमा विभाजित कांग्रेसले ठूलो राजनीतिक क्षति भोग्नुका साथै जनविश्वास समेत गुमाउनुपरेको स्मरण गर्दै अहिलेको परिस्थितिमा आत्मसमीक्षा गर्दै साझा धारणा र संगठनात्मक एकतासहित अघि बढ्नुपर्ने आवश्यकता औंल्याएका छन्।
उनले हालै सम्पन्न आम निर्वाचनको परिणामले पार्टीलाई गम्भीर रूपमा झस्काएको र क्षति समेत पुगेको उल्लेख गर्दै अब नयाँ सोच, दृष्टिकोण र साझा भावनासहित अघि बढ्नुको विकल्प नरहेको बताएका छन्।
खड्काले पार्टी नेतृत्वमा रहेका सबैलाई एकता, सहकार्य र साझा विचारका आधारमा अघि बढ्न पुनः आग्रह गर्दै निर्णायक तहमा रहेका नेताहरूले जिम्मेवारीपूर्वक कदम चाल्ने विश्वास व्यक्त गरेका छन्।
