काठमाडौँ। जेनजी उमेर समूहका न्युटन आचार्यद्वारा लिखित ‘पर्वतनन्दिनी’ उपन्यास सार्वजनिक गरिएको छ ।
आज यहाँ आयोजित कार्यक्रममा साहित्यकार डा नवराज लम्सालले उपन्यास सार्वजनिक गर्दै डरलाई निर्भिकतापूर्वक निकाल्ने सामथ्र्य लेखकमा हुनुपर्ने बताउनुभयो । आचार्यको पहिलो कृतिमै त्यो लक्षण देखिएको पनि उहाँले सुनाउनुभयो ।
‘पर्वतनन्दिनी’ उपन्यासमा निराशाभन्दा आशा भरिएको भन्दै डा लम्सालले हरेक युवाले आवेगलाई सामाजिक सञ्जालमा नपोखी पानीको बाँध बाँधेर विद्युत् निकाले जस्तै सृजनामा प्रयोग गर्नुपर्नेमा जोड दिनुभयो ।
कार्यक्रममा नेपाली लेखक सङ्घका कोषाध्यक्ष विसुकुमार केसीले कृतिमा युवाको मनको भावना समेटिएको भन्दै प्रशंसा गर्नुभयो ।
लेखक आचार्यले १९ वर्षदेखि कृति लेख्न थालेको जानकारी दिँदै समाजमा भएका समस्या कोट्याएर उपन्यासमा राखेको बताउनुभयो । आफू सानो छँदा हजुरबुबाले सुनाएको रामायणको श्लोक र विसं २००३ मा परेको असिना पानीले गाउँका दुई जना बितेको घटनालाई लिएर लेखेको कविता सुनेर आफू साहित्य लेखनमा आकर्षित भएको सुनाउनुभयो ।
कार्यक्रममा भू–गर्भशास्त्री कल्याणराज भट्टराईले लेखक आचार्य भू–गर्भशास्त्रको विद्यार्थी हुँदादेखि नै रचनात्मक भएको आफूले पाएको बताउनुभयो ।
रेडक्रसकर्मी धर्मदत्त विडारी, नेपाली लेखक सङ्घका केन्द्रीय सदस्य सुदर्शन आचार्य, लेखकका पिता निइन्द्रप्रसाद आचार्यलगायतले २३ वर्षकै उमेरमा न्युटनले गरेको सिर्जना प्रशंसा गर्न लायक भएको बताउनुभएको थियो । रासस
