काठमाडौं । नेपाल उद्योग वाणिज्य महासंघको नयाँ नेतृत्व चयनका लागि आज मतदान प्रक्रिया सुरु हुँदैछ । सोमबारबाट प्रारम्भ भएको साधारणसभा अन्तर्गत मंगलबार निर्वाचनमार्फत बाँकी पदाधिकारी टुंग्याइने कार्यक्रम रहेको छ ।
महासंघको विधानअनुसार हालका वरिष्ठ उपाध्यक्ष अञ्जन श्रेष्ठ स्वतः अध्यक्ष बन्ने भएकाले अन्य पदमा प्रतिस्पर्धा हुने भएको हो । निर्वाचन कमलादीस्थित नेपाल प्रज्ञा प्रतिष्ठानमा सञ्चालन हुनेछ ।
मुख्य निर्वाचन अधिकृत लीलामणि पौडेलका अनुसार कुल ७३ पदका लागि १३७ जनाले उम्मेदवारी दिएका छन् । चार उपाध्यक्षसहित विभिन्न सदस्य पदका लागि मतदान हुने छ । उपाध्यक्षमध्ये जिल्ला/नगरतर्फ २, एसोसिएटतर्फ १ र वस्तुगततर्फ १ जना चयन गरिनेछ ।
मतदानमा करिब दुई हजारभन्दा बढी मतदाता सहभागी हुने अपेक्षा गरिएको छ । महासंघका अनुसार एसोसिएट समूहमा १८५०, जिल्ला/नगरमा १२९, वस्तुगत संघमा १०७, वस्तुगत महासंघमा १७, द्विराष्ट्रियमा ८ र संस्थापक समूहमा १२ जना मतदाता रहेका छन् ।
निर्वाचन बिहान ८ बजेदेखि दिउँसो ४ बजेसम्म सञ्चालन हुने छ भने मतपरिणाम बुधबार सार्वजनिक गरिने जनाइएको छ
