काठमाडौं । अर्थमन्त्री डा. स्वर्णिम वाग्लेले मुलुकमा लामो समयदेखि जरा गाडेर बसेको संस्थागत कब्जा, नीतिगत सेटिङ र राजनीतिक–व्यवसायिक अपवित्र गठजोड अन्त्य गर्न वर्तमान सरकार सक्रिय रूपमा अघि बढिरहेको बताउनुभएको छ ।
राजधानीमा आयोजित एक कार्यक्रममा बोल्दै अर्थमन्त्री वाग्लेले विगतमा भएका आर्थिक दोहन र लुटतन्त्रसम्बन्धी प्रतिवेदनहरू अध्ययन गर्दा आफू स्तब्ध हुने गरेको उल्लेख गर्नुभयो । उहाँका अनुसार ती प्रतिवेदनहरूले राज्य संरचनाभित्र गहिरो रूपमा फैलिएको बेथिति र अनियमितताको चित्रण गर्छन्, जसलाई अब अन्त्य गर्नु अनिवार्य छ ।
उहाँले ‘एलिट’ वर्गले लामो समयदेखि राज्यका निकायहरू कब्जा गर्दै नीतिगत रूपमा आफ्नै स्वार्थअनुसार प्रणाली सञ्चालन गरेको आरोप लगाउँदै त्यस्तो प्रवृत्ति तोड्न सरकार दृढ रहेको बताउनुभयो । निजी क्षेत्रलाई सम्बोधन गर्दै उहाँले विगतका गल्तीहरू दोहोरिन नदिन र अपराधीलाई संरक्षण नगर्न आग्रह पनि गर्नुभयो ।
अर्थमन्त्री वाग्लेले निजी क्षेत्रका केही पक्षमा सरकार कठोर बन्न खोजिरहेको हो कि भन्ने आशंका देखिए पनि त्यस्तो नभएको स्पष्ट पार्नुभयो । उहाँका अनुसार वर्तमान सरकार “फोहोर सफा गर्ने” अभियानमा रहेको र त्यसलाई विवेकपूर्ण र सावधानीपूर्वक अघि बढाइनेछ ।
उहाँले एक व्यवसायीले आफूलाई दिएको पुरानो अनुभव उल्लेख गर्दै नेपालको कानुनी संरचनाले इमानदार व्यक्ति पनि गलत बाटोमा धकेलिन सक्ने अवस्था रहेको बताउनुभयो । त्यसैले अब कानुन र प्रणालीमा सुधार आवश्यक रहेको उहाँको जोड थियो ।
वाग्लेले इमानदार उद्यमीलाई प्रोत्साहन गर्ने वातावरण निर्माण सरकारको प्राथमिकता रहेको उल्लेख गर्दै कर तिर्ने, रोजगारी सिर्जना गर्ने र अर्थतन्त्रलाई मजबुत बनाउने निजी क्षेत्रलाई राज्यले संरक्षण गर्ने बताउनुभयो ।
प्रधानमन्त्रीको सुशासनप्रतिको प्रतिबद्धता उल्लेख गर्दै उहाँले काठमाडौं महानगरमा बालेन्द्र साह नेतृत्वको कार्यकालमा ठूलो बजेट परिचालन भए पनि कुनै ठूला अनियमितता नदेखिनु सकारात्मक उदाहरण भएको टिप्पणी गर्नुभयो ।
अर्थमन्त्रीले आगामी बजेटमा निजी क्षेत्रमैत्री नीतिहरू स्पष्ट रूपमा प्रस्तुत हुने संकेत पनि दिनुभयो । लगानी आकर्षित गर्ने, निजी सम्पत्तिको सुरक्षा सुनिश्चित गर्ने तथा कर प्रणालीलाई सरल र झन्झटमुक्त बनाउने दिशामा सरकार अघि बढ्ने उहाँको भनाइ छ ।
उहाँले वर्तमान सरकारको उद्देश्य नयाँ र स्वच्छ आर्थिक सुरुवातको संकेत दिनु रहेको उल्लेख गर्दै यो परिवर्तन केहीका लागि पीडादायी हुन सक्ने भए पनि देशको दीर्घकालीन हितका लागि आवश्यक रहेको बताउनुभयो ।
