काठमाडौं । पसलको आवरणमा हुन्डीको कारोबार गर्ने व्यवसायीलाई प्रहरीले पक्राउ गरेको छ । महानगरीय अपराध महाशाखाले बिहीबार न्युरोडबाट गोवद्र्धनप्रसाद सरावगी र उनका कामदार कृष्णप्रसाद भट्टराईलाई पक्राउ गरेको हो । सरावगीले न्युरोडमा अञ्जनी ओभरसिज कम्पनी दर्ता गरी पसल चलाउँदै आएका छन् ।
कपडा तथा भाँडाको सामान बिक्रीको आवरणमा उनले हुन्डीको काम गर्दै आएको महाशाखाका प्रमुख एसएसपी सहकुल थापाले बताए । सुरुमा प्रहरीले उनका कर्मचारी भट्टराईलाई हुन्डीको ३० लाखसहित पक्राउ गरेको थियो ।
सरावगीसँग समेत स्रोत नखुलेको आठ लाख ४२ हजार रुपैयाँ बरामद भएको प्रहरीले जनाएको छ । उनले भारत र चीनमा हुन्डीको कारोबार गर्दै आएको प्रहरी दाबी छ । न्युरोड क्षेत्रमा हुने अन्य हुन्डी कारोबारबारे समेत सूचना संकलन भइरहेको एसएसपी थापाले बताए । नयाँ पत्रिका दैनिकबाट
