काठमाडौं । अख्तियार दुरुपयोग अनुसन्धान आयोगले घुस लिएको आरोपमा एक प्रहरी कर्मचारीलाई नियन्त्रणमा लिएको जनाएको छ।
आयोगले आइतबार जारी गरेको प्रेस विज्ञप्तिअनुसार जिल्ला प्रहरी कार्यालय, कास्कीको मुद्दा फाँटमा कार्यरत प्रहरी वरिष्ठ हवल्दार विष्णु थापा क्षेत्रीलाई नियन्त्रणमा लिइएको हो।
लागूऔषध सम्बन्धी मुद्दामा सहजीकरण गरिदिने भन्दै सेवाग्राहीसँग घुस माग गरेको भन्ने सूचना तथा उजुरीका आधारमा आयोगको कार्यालय, पोखराबाट खटिएको टोलीले उनलाई पक्राउ गरेको जनाइएको छ।
आयोगका अनुसार उनले सेवाग्राहीबाट रु ५० हजार घुस लिइसकेको अवस्थामा उक्त रकमसहित २०८३ साल वैशाख १२ गते नियन्त्रणमा लिइएको हो।
घटनाबारे थप अनुसन्धान भइरहेको आयोगका प्रवक्ता सुरेश न्यौपानेले जानकारी दिएका छन्।
