काठमाडौं ।सशस्त्र प्रहरी बलले विपद् व्यवस्थापन र उद्धार क्षमतालाई सुदृढ बनाउन देशभर स्थायी तथा अस्थायी संरचना विस्तार गर्ने भएको छ । बिहीबार संघीयता सबलीकरण तथा राष्ट्रिय सरोकार समितिको बैठकमा सशस्त्र प्रहरी बलका अतिरिक्त महानिरीक्षक (एआईजी) गणेश ठाडा मगरले विपद् प्रतिकार्यलाई प्रभावकारी बनाउन ९ वटा स्थायी र ६० वटा अस्थायी विपद् व्यवस्थापन बेस स्थापना गर्ने तयारी भइरहेको जानकारी दिए।
उनका अनुसार हालसम्म सुनसरीको चतरा, सप्तरीको भारदह, काभ्रेको भकुण्डे, डोटीको बोर्डर, गोरखाको आरुटार र जुम्लामा गरी ६ वटा नयाँ बेस स्थापना भइसकेका छन् । साथै, सशस्त्र प्रहरी बलले विपद् व्यवस्थापनका लागि चार वटा स्थायी अपरेशनल युनिट सञ्चालन गरिरहेको छ, जसमा कुरिनटारस्थित तालिम केन्द्र, मनाङको उच्च पर्वतीय उद्धार तालिम शिक्षालय, सप्तरीको विशेष कार्य शिक्षालय र विपद् उद्धार गण रहेका छन् ।
एआईजी ठाडा मगरले विपद् व्यवस्थापनमा दक्ष जनशक्ति परिचालन गरिएको जानकारी दिँदै हालसम्म ४ हजार ५१३ जनाले विशेष तालिम प्राप्त गरिसकेको बताए। ती जनशक्तिलाई आवश्यकताअनुसार विभिन्न युनिटमा परिचालन गरिएको छ । साथै, हेडक्वार्टरदेखि सीमा सुरक्षा पोस्ट (बीओपी) सम्म विपद् प्रतिकार्यका लागि ८ हजार ११० जना सशस्त्र प्रहरी कर्मचारी समावेश गरी विशेष टोली गठन गरिएको छ ।
उनका अनुसार गत वर्षदेखि सुरु गरिएको ‘विपद् स्वयंसेवक तालिम’ कार्यक्रममार्फत स्थानीय तहमा समेत जनशक्ति उत्पादन भइरहेको छ । गत वर्ष ९९० जनाले तालिम लिएका थिए भने यस वर्ष हालसम्म २२९ जनाले तालिम पूरा गरेका छन् र थप १३५ जना प्रशिक्षणरत छन् । प्रत्येक वडामा २५ जनाको दरले विपद् सूचक (स्वयंसेवक) विकास गर्ने लक्ष्यअनुसार कार्यक्रम अघि बढाइएको छ ।
तर, दक्ष जनशक्ति भए पनि आवश्यक उद्धार सामग्रीको अभावले अपेक्षित रूपमा काम गर्न नसकिएको सशस्त्र प्रहरीले जनाएको छ । देशभर रहेका ५४७ युनिटमध्ये धेरैमा आधारभूत सामग्री अपुग रहेको उल्लेख गर्दै विपद् प्राधिकरण, गृह मन्त्रालय तथा प्रदेश र स्थानीय तहसँग समन्वय गरी सामग्री व्यवस्थापनको प्रयास भइरहेको जानकारी दिइएको छ ।
बैठकमा वर्षायाम सुरु भएसँगै आगलागी, बाढी, पहिरो, महामारीलगायत विपद्जन्य जोखिम न्यूनीकरण, प्रतिकार्य तथा पुनर्लाभ तयारीका विषयमा विस्तृत छलफल गरिएको थियो ।
