काठमाडाैँ । कानून, न्याय तथा संसदीय मामिला मन्त्री सोविता गौतमसँग नेपालका लागि जापानका राजदूत माएदा तोरुले शिष्टाचार भेट गर्नुभएको छ।
नवनियुक्त मन्त्री गौतमलाई जापानी राजदूत माएदा तोरुले बधाई तथा सफल कार्यकालको शुभकामना व्यक्त गर्नुभएको हो।
भेटका क्रममा दुई पक्षबीच कानून सुधारका विषयमा भइरहेको विगतको सहकार्यलाई निरन्तरता दिने विषयमा छलफल भएको छ। साथै सूचना प्रविधि तथा आर्टिफिसियल इन्टेलिजेन्सको तीव्र विकाससँगै बदलिँदो विश्व परिवेशमा उपयुक्त नियमनका लागि आवश्यक कानूनी संरचना विकास गर्ने विषयमा जोड दिइएको छ।
त्यस अवसरमा द्विपक्षीय सहकार्यका थप सम्भावित क्षेत्रहरू पहिचान गर्ने विषयमा पनि छलफल भएको जनाइएको छ। नेपाल सरकार आवश्यक परेका विषयमा छलफल तथा सहकार्यका लागि खुला रहेको सन्देश पनि मन्त्री गौतमले जापानी पक्षलाई दिनुभएको बताइएको छ।
नेपाल–जापानबीचको दीर्घकालीन मैत्रीपूर्ण सम्बन्धलाई अझ सुदृढ बनाउने र कानूनी तथा नीतिगत क्षेत्रमा आपसी सहकार्य विस्तार गर्ने विषयमा दुवै पक्ष सकारात्मक देखिएका छन्।
