काठमाडौँ । कोसी प्रदेशस्तरीय कांग्रेसको समीक्षा बैठक हिजो बिराटनगरमा आयोजना भएको थियो । सो भेलामा प्रमुख अतिथि थिए सभापति गगन थापा । तर आफ्नै गृहनगरमा भएको सो बैठकमा कांग्रेसका वरिष्ठ नेता डा शेखर कोइराला भने गएनन् ।
नेता कोइराला हिजोआज विराटनगरमै छन् । तर पनि हिजो मात्र आफ्नो पार्टीले आयोजना गरेको कोशी प्रदेशस्तरीय चुनावी समीक्षा बैठकमा भने अनुपस्थित रहे । सर्वोच्च अदालतले गगन पक्षीय कांग्रेसलाई वैधानिकता दिएको विषयको भने उनी पक्षमा नै थिए । कोइराला पक्षले पनि सर्वोच्चको आदेश स्वीकार गर्ने निष्कर्ष पनि निकालेको थियो ।
तैपनि पार्टीको संस्थापनइतर पक्षमा भने अझै पनि अन्योल देखिएको छ । हिजोको सोही कार्यक्रममा पनि संस्थापनइतर पक्षमा असन्तष्टि नै देखिएको छ । सो भेलामा डा कोइराला त गएनन् नै, तर अरु पनि उनी पक्षका नेता कार्यकर्ताहरु त्यहाँ निकै कममात्र उपस्थित थिए ।
यद्यपि हिजोको सो कार्यक्रममा कोइरालानिकट नेता मीनेन्द्र रिजालदेखि सरिता प्रसाईंसम्म भने सहभागी भएका थिए ।
उनलाई कार्यक्रममा आउन सभापति थापाले फोन पनि गरेका थिए । तर पनि बुधबार बिहान विराटनगरस्थित कोइराला निवासमा पुगेका मीनेन्द्र रिजाल र रामहरि खतिवडालाई कोइरालाले आफू कार्यक्रममा नआउने जानकारी गराएका थिए ।
उता डा कोइरालाले आफू निकटका नेताहरुको बैठक भने विराटनगरमा गरिरहेका छन् । केही दिनयता विराटनगरमा रहेका उनले त्यहीँ प्राय दिनहुँजसो आफू पक्षका नेताहरुको बैठक गरिरहेका बताइएको छ ।
