ललितपुर — लगनखेलस्थित गतिशील बचत तथा ऋण सहकारी संस्था लिमिटेडका अध्यक्ष बलराम पाठक ठगी आरोपमा पक्राउ परेका छन्। आकर्षक ब्याजको प्रलोभन देखाएर सर्वसाधारणबाट रकम संकलन गरी फिर्ता नगरेको आरोपमा उनलाई प्रहरीले नियन्त्रणमा लिएको हो।
प्रहरीका अनुसार अध्यक्ष पाठकसहित ७ जना संचालक समितिका पदाधिकारीविरुद्ध ४४ जना बचतकर्ताले उजुरी दिएका छन्। उजुरीमा उनीहरूले करिब ७ करोड रुपैयाँ ठगी भएको दाबी गरेका छन्। बचतकर्ताहरूले विभिन्न समयमा जम्मा गरेको रकम फिर्ता माग्दा संस्थाका पदाधिकारीहरूले रकम नदिएको आरोप लगाइएको छ।
उक्त घटनाबारे सहकारी विभागबाट समेत कारबाहीका लागि सिफारिस प्राप्त भएपछि प्रहरीले अनुसन्धान अघि बढाएको हो। अनुसन्धानकै क्रममा अध्यक्ष पाठकलाई पक्राउ गरी २०८३ साल वैशाख ६ गते ललितपुर जिल्ला अदालतबाट ५ दिनको म्याद थप गरी थप अनुसन्धान भइरहेको प्रहरीले जनाएको छ।
प्रहरीले सो सहकारी संस्थामा रकम जम्मा गरेका अन्य पीडितहरूलाई समेत कार्यालयमा सम्पर्क गरी उजुरी दिन आग्रह गरेको छ।
