काठमाडौं: वैदेशिक रोजगारीका लागि बुल्गेरिया पठाइदिन्छु भन्दै ठगी गर्ने दुई जनालाई प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालय टेकुका अनुसार आकर्षक तलबको प्रलोभन देखाई बुल्गेरिया पठाइदिन्छु भन्दै रकम असुली गर्ने कार्यमा संलग्न व्यक्तिहरूलाई काठमाडौं उपत्यकाका विभिन्न स्थानबाट पक्राउ गरिएको हो।
पक्राउ पर्नेमा सल्यान घर भई हाल ललितपुर बस्दै आएका ३२ वर्षीय दिपेन्द्र केसी र सल्यानकै २४ वर्षीय घने बुढा रहेका छन्। उनीहरूले पीडितहरूबाट वैदेशिक रोजगारीको नाममा करिब ९१ लाख ९० हजार रुपैयाँ ठगी गरेको प्रहरीले जनाएको छ।
प्रहरीका अनुसार उनीहरूले पीडितहरूलाई लामो समयसम्म झुक्याएर विदेश नपठाई सम्पर्कविहीन हुने गरेका थिए। पक्राउ परेका दुवै जनालाई थप अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको छ।
