काठमाडौं । ललितपुरको मंगलबजार क्षेत्रमा भएको खुडा प्रहार घटनामा संलग्न रहेको आरोपमा प्रहरीले दुई जनालाई पक्राउ गरेको छ। जिल्ला प्रहरी परिसर ललितपुरले बिहीबार प्रेस विज्ञप्ति जारी गर्दै घटनामा संलग्न व्यक्तिहरूलाई नियन्त्रणमा लिएर थप अनुसन्धान भइरहेको जनाएको हो।
प्रहरीका अनुसार ललितपुर महानगरपालिका–१२ मंगलबजारस्थित कृष्ण मन्दिर अगाडि दुई पक्षबीच कुटपिट तथा खुडा प्रहार भएको सूचना प्राप्त हुनासाथ प्रहरी टोली घटनास्थल पुगेको थियो। घाइतेहरूलाई तत्काल उद्धार गरी बि एण्ड बि अस्पताल पुर्याइएकोमा उपचारका क्रममा दुई जनाको मृत्यु भएको प्रहरीले जनाएको छ।
घटनामा संलग्न रहेको आरोपमा भाग्दै गरेका संजिव नेपालीलाई खुडा सहित नियन्त्रणमा लिइएको तथा उनका सहयोगी गगन सुनारलाई पनि पक्राउ गरिएको प्रहरीको भनाइ छ।
प्रारम्भिक अनुसन्धानअनुसार सामाजिक सञ्जालमार्फत चिनजान भएका युवाहरूबीच भेटघाटका क्रममा सामान्य विवाद चर्किँदै हिंसात्मक झडपमा परिणत भएको देखिएको प्रहरीले जनाएको छ।
घटनास्थलबाट प्रहरीले खुडा, फलामे नक्कल, स्कुटर र मोबाइल फोनसमेत बरामद गरेको छ।
प्रहरीले घटनाबारे थप अनुसन्धान भइरहेको जनाएको छ।
