काठमाडाैँ । स्याङ्जामा नदिजन्य पदार्थको अवैध उत्खनन् तथा ओसार–पसारमा संलग्न दुई वटा ट्याक्टर प्रहरीले नियन्त्रणमा लिएको छ।
जिल्लाका विभिन्न स्थानमा खटिएको प्रहरी गस्ती टोलीले बिना रसिद बालुवा तथा गिट्टी ओसार–पसार गरिरहेको अवस्थामा ती ट्याक्टरहरू फेला पारी नियन्त्रणमा लिएको हो।
प्रहरीका अनुसार लु. ३ त. ८८०१ नम्बरको ट्याक्टर स्याङ्जाको पुतलीबजार नगरपालिका–३ बाडखोलाबाट २०८२ चैत २२ गते जिल्ला प्रहरी कार्यालय स्याङ्जाले नियन्त्रणमा लिएको हो। उक्त ट्याक्टरबाट बालुवा ओसार–पसार भइरहेको थियो। नियन्त्रणमा लिइएको ट्याक्टरलाई आवश्यक कारवाहीका लागि गल्याङ नगरपालिकामा पठाइएको छ।
त्यसैगरी ग. १ त. ५३७१ नम्बरको अर्को ट्याक्टर गल्याङ नगरपालिका–८ निबुवा, आँधिखोलाबाट २०८२ चैत २१ गते प्रहरी चौकी गल्याङले नियन्त्रणमा लिएको जनाएको छ। उक्त ट्याक्टरमा बालुवा र गिट्टी मिसिएको सामग्री ओसार–पसार भइरहेको थियो। यसलाई कारवाहीका लागि पुतलीबजार नगरपालिकामा पठाइएको छ।
प्रहरीले नदिजन्य पदार्थको अवैध उत्खनन् तथा ओसार–पसार नियन्त्रणका लागि निगरानी कडा पारिएको जनाएको छ।
