काठमाडौं: काठमाडौं उपत्यका अपराध अनुसन्धान कार्यालयले वैदेशिक रोजगारीका नाममा ठगी गर्ने चार जनालाई पक्राउ गरेको जनाएको छ।
कार्यालयले प्रेस विज्ञप्ति जारी गर्दै बेरोजगार युवायुवतीलाई आकर्षक तलबको प्रलोभनमा फिनल्यान्ड, माल्टा र सर्विया पठाइदिने भन्दै ठगी गर्ने गिरोहका सदस्यहरूलाई काठमाडौं उपत्यकाका विभिन्न स्थानबाट पक्राउ गरिएको जानकारी दिएको हो।
पक्राउ पर्नेमा कर्ण बहादुर राउत, आनन्द थापा, राधिका पाठक पौडेल र तिलक परियार रहेका छन्। उनीहरूले पीडितहरूबाट लाखौं रुपैयाँ असुलेको प्रहरीले जनाएको छ।
प्रहरीका अनुसार कर्ण बहादुर राउतले ५७ लाख रुपैयाँ ठगी गरेका छन् भने आनन्द थापाले ४ लाख ५० हजार, राधिका पाठक पौडेलले ४ लाख २० हजार र तिलक परियारले ८ लाख रुपैयाँ ठगी गरेका छन्।
उनीहरूले लामो समयसम्म पीडितलाई झुक्याएर विदेश नपठाई सम्पर्कविहीन भएको उजुरीपछि अनुसन्धान सुरु गरिएको थियो। पक्राउ परेकालाई थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।
