काठमाडाैँ । प्रमुख प्रतिपक्षी दल नेपाली काँग्रेसले जेन–जी आन्दोलनका क्रममा भदौ २३ र २४ गते भएका घटनालाई अलग–अलग नभई समग्र रूपमा निष्पक्ष छानबिन गर्नुपर्ने आवश्यकता औँल्याएको छ ।
प्रतिनिधि सभाको बिहीवारको बैठकमा बोल्दै काँग्रेस नेता भीष्मराज आङ्देम्बेले जेन–जी आन्दोलनका घटनामा निष्पक्ष अनुसन्धान हुन नसकेको दाबी गरेका हुन्। उनले संसद भवन, सिंहदरबारलगायतका संरचनामा भएको क्षतिको विषयमा सत्यतथ्य बाहिर आउन नसकेको भन्दै सरकारले गठन गरेको जाँचबुझ आयोगप्रति प्रश्न उठाए ।
आङ्देम्बेले आयोगले भदौ २३ गते भएका घटनाको अनुसन्धान गरी कारबाही सिफारिस गरे पनि २४ गतेका घटनाबारे पर्याप्त छानबिन नगरेको आरोप लगाए । पटक–पटक समय थपिँदा पनि अन्ततः काम पूरा नभएको भन्दै उहाँले आयोगको कार्यशैलीमाथि आशंका व्यक्त गरे।
उनले कुनै एक पक्षलाई मात्रै हेर्ने प्रवृत्ति गलत हुने भन्दै दुवै दिनका घटनालाई समान रूपमा मूल्यांकन गर्नुपर्नेमा जोड दिए। दमन र क्षति दुबै पक्षका घटना नहेरी निष्कर्ष निकाल्नु न्यायसंगत नहुने उनको भनाइ थियो ।
संसद भवन र अन्य सरकारी संरचनामा भएको आगजनी तथा क्षतिको स्मरण गर्दै उनले भविष्यमा यस्ता घटना दोहोरिन नदिन राष्ट्रिय रूपमा गम्भीर समीक्षा आवश्यक रहेको उल्लेख गरे । उनले सरकारलाई आयोगको प्रतिवेदन सार्वजनिक गर्न पनि आग्रह गरे।
आङ्देम्बेले सरकारलाई कानुनी प्रक्रिया र मर्यादाभित्र रहेर पारदर्शी रूपमा अघि बढ्न सुझाव दिँदै दोषी उम्किन नहुने र निर्दोषलाई कारबाहीको भागीदार बनाउन नहुने काँग्रेसको पुरानो मान्यता दोहोर्याए ।
उनले मुलुकमा राजनीतिक स्थायित्वका लागि सरकारलाई पूर्ण कार्यकाल सञ्चालन गर्न सक्ने वातावरण निर्माण गर्नुपर्ने आवश्यकता पनि औँल्याए ।
