काठमाडाैँ । राष्ट्रिय स्वतन्त्र पार्टी (रास्वपा)का सभापति रवि लामिछानेले राज्यको उपेक्षामा परेको दलित समुदायसँग प्रतिनिधि सभाबाट सार्वजनिक रूपमा क्षमायाचना गरेका छन् ।
प्रतिनिधि सभाको बिहीवारको बैठकमा बोल्दै उनले दलित समुदायमाथि वर्षौँदेखि भएको विभेद, अन्याय र उपेक्षाप्रति राज्यका तर्फबाट माफी माग्नुपर्ने आवश्यकता औँल्याउँदै सो क्षमायाचना व्यक्त गरेका हुन्।
सभापति लामिछानेले सांसद खगेन्द्र सुनारको उदाहरण दिँदै निर्वाचन प्रक्रियाका क्रममा उनीमाथि उठेका विवाद र त्यसपछि उहाँले गरेको क्षमायाचनाको प्रसङ्ग उल्लेख गरे। त्यस क्रममा उनले प्रश्न गर्दै भने राज्यले अहिलेसम्म दलित समुदायसँग कहिल्यै माफी माग्यो?
उनले सदनमा सम्बोधन गर्दै दलित समुदायमाथि भएको व्यवहारलाई साधारण अन्याय मात्र नभई संरचनागत र संगठित अपराधका रूपमा व्याख्या गरे । लामिछानेले वर्षौँदेखि भइरहेको विभेदप्रति राज्यका तर्फबाट औपचारिक रूपमा क्षमायाचना आवश्यक रहेको धारणा राख्दै संसदबाटै त्यसको घोषणा गरे ।
उनले राज्यका विभिन्न निकायबाट भएका कमजोरीका कारण दलित समुदायले लामो समयदेखि पीडा भोग्दै आएको उल्लेख गर्दै अब त्यसप्रति सामूहिक जिम्मेवारी लिनुपर्ने बताए ।
