काठमाडौं: शिक्षा, विज्ञान तथा प्रविधि मन्त्रालयले विद्यालय तहदेखि उच्च शिक्षासम्म सञ्चालन हुँदै आएका ‘एण्ट्रान्स प्रिपरेशन’ कक्षा तथा ब्रिज कोर्सहरू बन्द गर्ने निर्णय गरेको छ।
मन्त्रालयद्वारा जारी प्रेस विज्ञप्तिअनुसार विभिन्न शैक्षिक संस्थाहरूले भर्ना प्रक्रिया अघि नै प्रवेश परीक्षा तयारी कक्षा सञ्चालन गर्दै आएकोमा यसले विद्यार्थीको मनोविज्ञानमा नकारात्मक असर पार्नुका साथै अनावश्यक आर्थिक बोझ बढाएको निष्कर्ष निकालिएको छ।
सोही आधारमा आगामी २०८३ साल वैशाख १ गतेदेखि यस्ता कार्यक्रम पूर्ण रूपमा बन्द गर्न निर्देशन दिइएको छ। यस निर्णयलाई कार्यान्वयन गर्न सम्बन्धित सबै निकाय तथा संस्थाहरूलाई मन्त्रालयले अनुरोध गरेको छ।
साथै, निर्देशन विपरीत यस्ता कक्षा सञ्चालन गरेको पाइएमा प्रचलित कानूनअनुसार कारबाही गरिने चेतावनी समेत दिइएको छ।
