काठमाडौँ । निर्वाचन आयोगले हालै सम्पन्न प्रतिनिधिसभा सदस्य निर्वाचनलाई नेपालको इतिहासमै सबैभन्दा शान्तिपूर्ण र विवादरहित निर्वाचनका रूपमा मूल्याङ्कन गरेको छ ।
बुधवार आयोगद्वारा आयोजित जलपान समारोहमा बोल्दै कार्यवाहक प्रमुख निर्वाचन आयुक्त रामप्रसाद भण्डारीले उक्त निर्वाचन ऐतिहासिक रूपमा सफल भएको उल्लेख गरे । उनका अनुसार कुनै पनि मतदान केन्द्रमा झैझगडा वा विवादका कारण पुनः मतदान गर्नुपर्ने अवस्था नआएकोले यो निर्वाचन विगतका भन्दा फरक र उदाहरणीय बनेको हो ।
उनले निर्वाचन अवधिभर राजनीतिक दल, उम्मेदवार र मतदाताबाट अभूतपूर्व संयम र सद्भाव प्रदर्शन भएको बताउँदै त्यसप्रति प्रशंसा व्यक्त गरे । विगतका निर्वाचनमा आचारसंहिता उल्लङ्घन, उम्मेदवारको योग्यता, सुरक्षा व्यवस्थालगायत विषयमा विवाद देखिने गरे पनि यसपटक त्यस्ता समस्या नदेखिएको उनको भनाइ थियो ।
भण्डारीले अन्तरराष्ट्रिय पर्यवेक्षकहरूले समेत निर्वाचनलाई स्वच्छ, निष्पक्ष र भयरहित वातावरणमा सम्पन्न भएको भन्दै उच्च मूल्याङ्कन गरेको प्रतिवेदन प्राप्त भएको जानकारी दिए। साथै, जेन–जी आन्दोलन भएको ६ महिनाभित्रै निर्वाचन सम्पन्न हुनुलाई विश्व समुदायले सकारात्मक रूपमा लिएको उहाँले उल्लेख गरे।
उनले सबै सरोकारवालाको सहकार्य र जिम्मेवार भूमिकाका कारण निर्वाचन सफलतापूर्वक सम्पन्न भएको भन्दै सहयोग गर्ने सम्पूर्ण पक्षप्रति धन्यवाद व्यक्त गरे।
