काठमाडाैँ । सुनसरीको सदरमुकाम इनरुवासहित विभिन्न स्थानमा श्रद्धा र भक्तिभावका साथ चैती छठ पर्व मनाइएको छ। इटहरी उपमहानगरपालिकाको बुढी खोलादेखि इनरुवा, भोक्राहा, कोसी र हरिनगरलगायत क्षेत्रका जलासय तथा कृत्रिम पोखरीमा भक्तजनको उल्लेख्य उपस्थिति देखिएको थियो।
मङ्गलबार साँझ अस्ताउँदो सूर्यलाई अघ्र्य दिएका व्रतालुहरूले बुधबार बिहान उदाउँदो सूर्यलाई अघ्र्य अर्पण गर्दै पर्वको विधिवत् समापन गरेका छन्। छठको चौथो तथा अन्तिम दिन व्रतालुहरू सूर्योदयअघि नै कम्मरसम्म पानीमा डुबेर सूर्यदेवको आराधनामा तल्लीन देखिन्थे।
भक्तजनहरूले बाँसको डाला र नाङ्लोमा ठेकुवा, भुसुवा, केरा तथा अन्य मौसमी फलफूल सजाएर सूर्यको पहिलो किरणसँगै दूध र जलद्वारा अघ्र्य अर्पण गरेका थिए। अघ्र्य दिएसँगै ३६ घण्टा लामो कठिन निर्जल व्रतको समापन गरिएको छ।
पर्वका अवसरमा घाटहरूलाई झिलिमिली बत्ती र ध्वजापताकाले सिंगारिएको थियो, जसले धार्मिक वातावरणलाई थप आकर्षक बनाएको थियो। सूर्यदेव र छठी माईको पूजा गर्दा पारिवारिक सुख, समृद्धि र आरोग्य प्राप्त हुने धार्मिक विश्वास रहेको छ।
कात्तिक महिनामा मनाइने छठजत्तिकै महत्व राख्ने चैती छठ पछिल्ला वर्षहरूमा थप लोकप्रिय बन्दै गएको स्थानीयवासीले बताएका छन्। भक्तजन सुधिर साफीका अनुसार पछिल्ला केही वर्षयता चैती छठ मनाउनेको संख्या उल्लेख्य रूपमा बढेको छ।
यस्तै, स्थानीय नेहा मण्डलले बजार क्षेत्रमा कृत्रिम पोखरी निर्माण गरी तथा नदी, खोला र प्राकृतिक जलासयमा व्रतालुहरूले विधिपूर्वक अघ्र्य अर्पण गरेको जानकारी दिए।
