काठमाडौं । नेपालका लागि पाकिस्तानी दूतावासले आयोजना गरेको निबन्ध लेखन तथा वक्तृत्वकला प्रतियोगिताका उत्कृष्ट विद्यार्थी पुरस्कृत भएका छन्। पुरस्कार वितरण समारोहका प्रमुख अतिथि युवा तथा खेलकुदमन्त्री जगत्बहादुर सुनुवार (विश्वकर्मा) ले दुवै प्रतियोगिताका सर्वोत्कृष्ट छात्रछात्रालाई पुरस्कार तथा प्रमाणपत्र वितरण गर्नुभयो। पाकिस्तान(नेपाल फ्रेन्डशीप एण्ड कल्चरल एशोसिएसनका अध्यक्ष हिमालय शमशेर राणा कार्यक्रमका विशेष अतिथि हुनुहुन्थ्यो।
‘समावेशीभन्दा प्रतिस्पर्धात्मक सहभागिता सफलताको सूत्र’ विषयक वक्तृत्वकलामा प्रथम, द्वितीय र तृतीय स्थान प्राप्त गर्नेले क्रमशः ५० हजार, ४० र ३५ हजार नगद पुरस्कार र प्रमाणपत्र प्राप्त गरे। त्यसैगरी प्रतियोगिताका अन्य १२ उत्कृष्ट विद्यार्थीले पनि जनही ५ हजार रुपियाँ पुरस्कार पाए। त्यस्तै, ‘रेशम मार्गः विगत, वर्तमान र भविष्य’ विषयक निबन्ध लेखन प्रतियोगितामा प्रथम हुनेले ५० हजार, द्वितीयले ४०, तृतीयले ३५ र सान्तवना स्थान प्राप्त गर्नेले २५ हजार नगद र प्रमाणपत्र प्राप्त गरेका छन्। निबन्ध लेखन प्रतियोगिताका अन्य १० उत्कृष्ट विद्यार्थीलाई पनि जनही ५ हजार रुपियाँ पुरस्कार प्रदान गरिएको दूतावासले जनाएको छ। दूतावासले हरेक वर्ष आयोजना गर्दै आएको निबन्ध लेखन प्रतियोगिता यसपटकको आठौं र वक्तृत्वकला चौथो संस्करण हो।
मुलुकभरका एक हजारभन्दा बढी विद्यार्थीबाट उत्कृष्ट विद्यार्थी छनोट गरिएको र दुवै प्रतिस्पर्धामा कक्षा १२ देखि विश्वविद्यालय तहका छात्रछात्रा सहभागी भएका दूतावासले जनाएको छ।कार्यक्रममा बोल्दै खेलकुदमन्त्री विश्वकर्माले यस्ता प्रतियोगिताबाट दुवै मुलुकको सम्बन्धलाई नजिक्याउन सघाउ पुग्ने विश्वास व्यक्त गर्नुभयो। त्यसै गरी नेपालका लागि पाकिस्तानी राजदूत डा। मजार जावेदले दुवै मुलुकको सम्बन्ध र राष्ट्र निर्माणमा युवाको भूमिकाकाबारे चर्चा गर्नुभयो।