काठमाडाैँ । म्याग्दीका किसानले व्यावसायिक खेतीमार्फत वार्षिक रु ३० लाखसम्म आम्दानी गर्दै आएका छन्। यहाँका किसानले बेमौसमी तरकारी, फलफूल लगायतका उत्पादन गरेर गाउँमा समृद्धिको नयाँ इतिहास रचिरहेका छन्।
जिल्लाको बेनी नगरपालिका–२ लभ्लीहिलका चन्द्रबहादुर कार्की, खबराका सोभित शर्मा, भकिम्लीका टेकबहादुर घर्ती, मरेकका इन्द्र थापा, बासकुनाका तिलक गुरुङ, मङ्गला गाउँपालिका–३ का सन्तनाथ सापकोटा लगायतका किसानले तरकारी र फलफूल खेतीमार्फत आर्थिक सफलता हासिल गरेका छन्।
बेनी–२ का कार्कीले नौ रोपनी जमिनमा मौसमी र बेमौसमी तरकारी उत्पादन गर्दै वार्षिक रु ३० लाखभन्दा बढी आम्दानी गर्दै आएको जानकारी दिनुभयो। उहाँले धान फल्ने खेत र कोदो झुल्ने बारीभरि तरकारी र फलफूल खेती गर्दै आएका छन्। आफ्नो कमाइबाट बेनी बजार र गाउँमा घरसमेत बनाएका कार्कीले मल, बीउ, पानी र बजार समस्या समाधान गर्दै दिनरात मेहनत गरेका छन् । उनको बारीमा साग, बन्दाकोबी, प्याज, लसुन, मुला, गाजर, धनियाँ लगायतका तरकारीहरू रोपिएका छन्।
६५ वर्षिय कार्कीलाई जहिले पनि खेतबारीमा सक्रिय देख्न सकिन्छ। बेनी नगरपालिका–२ का वडाध्यक्ष यामबहादुर कार्कीले भने, “राष्ट्रकवि माधवप्रसाद घिमिरेको कविताका अंश ‘ढुङ्गाको काप फोरेर पनि उम्रन्छ पिपल’ जस्तै उहाँको जीवन सिर्जनात्मक श्रमको प्रत्यक्ष उदाहरण बनेको छ।”
कार्कीको सफलता युवालाई विदेश जाने सट्टा गाउँमै रहेर मेहनत गर्न प्रेरित गरेको छ। स्थानीय कृषक तेजेन्द्र कार्कीले भने, “कार्की दाइको पसिनाले माटोमा सुन फलाएको छ। उहाँको खेतबारी जापान, कोरिया वा अमेरिकाजस्ता व्यवस्थित छन्।”
पत्रकार महासङ्घ म्याग्दीका अध्यक्ष हरिकृष्ण गौतमका अनुसार कार्कीको मिहिनेतले गाउँमा पैसाको प्रवाह बढाएको छ र स्थानीय बजारमा तरकारी आपूर्ति सहज भएको छ। व्यापारीको कारोबार बढ्दा कतिपय युवाले गाउँमै रोजगारी पाउन थालेका छन्।
अध्यक्ष गौतमले भने, “जिल्लाका अधिकांश किसान पछिल्लो समय तरकारी र फलफूलको व्यावसायिक खेती गर्दै मनग्ये आम्दानी गर्दै आएका छन्। सिजनमा सुन्तला बेचेर रु पाँच लाखदेखि रु ४० लाखसम्म आम्दानी गर्ने किसान पनि छन्। यसरी तरकारी र फलफूलबाट विदेश भन्दा बढी आम्दानी गर्ने उदाहरण म्याग्दीमा प्रशस्त देखिन्छ।”
कार्कीले रासायनिक मल र विषादी नलगाई शुद्ध, अर्ग्यानिक तरकारी उत्पादनलाई प्राथमिकता दिएका छन्। यसले उपभोक्ताको विश्वास जितेको उनले बताए। बेनी बजारका व्यवसायी टीकाबहादुर पाण्डेले भने, “स्वास्थ्य सचेत उपभोक्ताले कार्की दाइको उत्पादनलाई प्राथमिकता दिन थालेका छन्।”
जिल्लाका किसानहरूले तरकारी र फलफूल खेतीबाट प्राप्त सफलता व्यक्तिगत मात्र नभई सामुदायिक समृद्धिको कथा भएको बताउँछन्। उद्योग वाणिज्य सङ्घ म्याग्दीका अध्यक्ष सुविन श्रेष्ठले भने, “किसानको यो उदाहरणीय मिहिनेतले गाउँमा आर्थिक गतिविधि बढाउन, रोजगारी सिर्जना गर्न र समृद्धिका पक्षमा सकारात्मक सन्देश प्रवाह गरेको छ।”
