काठमाडौं । नेपाल आयल निगमले बजारमा देखिएको ग्यास अभावलाई मध्यनजर गर्दै शुक्रबारदेखि देशभर आधा भरिएका ग्यास सिलिण्डर वितरण सुरु गरेको छ।
निगमका अनुसार देशमा ग्यास आयात भने खपतअनुसार नै भइरहे पनि उपभोक्तामा फैलिएको त्रासका कारण ग्यास सञ्चिति बढ्दा बजारमा वितरणमा समस्या देखिएको हो। यही अवस्थालाई सहज बनाउन ७.१ केजी ग्यास भरिएका आधा सिलिण्डर बजारमा पठाइएको निगमले जनाएको छ।
निगमका प्रवक्ता मनोज ठाकुरका अनुसार सुरुमा चुनावको सन्दर्भलाई लिएर ग्यास आपूर्तिमा समस्या हुनसक्ने आशंकाले उपभोक्ताले ग्यास जोहो गर्न थालेका थिए। त्यसपछि सञ्चारमाध्यममा ग्यास अभावको चर्चा बढेपछि उपभोक्तामा थप त्रास फैलिएको र ग्यास सञ्चिति गर्ने प्रवृत्ति झनै बढ्दा बजारमा अभाव देखिएको उनले बताए।
उनका अनुसार प्रारम्भमा एक–दुई कम्पनीको मात्र ग्यास अभाव देखिए पनि अहिले अन्य कम्पनीका ग्यास समेत सहज रूपमा नपाइने अवस्था बनेको छ। यही कारण वितरणलाई सहज बनाउन आधा सिलिण्डर ग्यास बजारमा पठाउने निर्णय गरिएको हो।
निगमका अनुसार देशमा ग्यास आयात भने खपतअनुसार नै भइरहेको छ। गत पुस महिनामा करिब ४७ हजार मेट्रिक टन ग्यास आयात गरिएको थियो भने माघ महिनामा करिब ४६ हजार मेट्रिक टन ग्यास आयात भएको छ। नेपालमा मासिक रूपमा करिब ४५ देखि ४६ हजार मेट्रिक टन ग्यास खपत हुने गरेको जानकारी निगमले दिएको छ। फागुन २६ गतेसम्म मात्रै करिब साढे ४६ हजार मेट्रिक टन ग्यास आयात भइसकेको पनि निगमले जनाएको छ।
प्रवक्ता ठाकुरका अनुसार ग्यास अभावको असर विशेषगरी विद्यार्थी र मजदुर वर्गमा बढी देखिएको छ। उनीहरूले एउटा सिलिण्डर ग्यास पाउन महिनौँ कुर्नुपर्ने अवस्था देखिएपछि समस्या समाधानका लागि ७.१ केजी ग्यास भरिएको आधा सिलिण्डर वितरण गर्ने निर्णय कार्यान्वयनमा ल्याइएको हो।
यसअघि पूर्ण सिलिण्डर ग्यासको मूल्य १ हजार ९ सय १० रुपैयाँ रहेकोमा अब आधा सिलिण्डर अर्थात ७.१ केजी ग्यासको मूल्य ९५५ रुपैयाँ तोकिएको निगमले जनाएको छ।
निगमका अनुसार अन्तर्राष्ट्रिय घटनाक्रमका कारण ऊर्जा संकटको चर्चा भए पनि हालसम्म ग्यास तथा इन्धन आयातमा कुनै समस्या नआएको बताइएको छ।
