काठमाडाैँ । प्रतिनिधिसभा सदस्य निर्वाचन २०८२ को लागि खटिएका निर्वाचन प्रहरीहरुलाई बिदाइ गरिएको छ। शान्तिपूर्ण निर्वाचन सम्पन्न भएपछि प्रहरीमा खुसी र उत्साह छाएको देखिएको छ।
भरतपुर महानगरपालिका–२९ मा खटिएकी लक्ष्मी भण्डारीले ४० दिनसम्म निर्वाचनमा सेवा पाएको अनुभवलाई रमाइलो भन्दै बर्णन गरिन्। उनले भनिन् कि राज्यको सेवा गर्ने अवसरले नेपालका सुरक्षा निकायको मेहनत बुझ्न सहज भएको छ। उनले निर्वाचनमा पाएको भत्ता आफ्ना छोराछोरीको अध्ययनमा खर्च गर्ने योजना बनाएकी छन्।
रेनुका पौडेलले पनि निर्वाचन शान्तिपूर्ण सम्पन्न भएकोमा खुशी व्यक्त गरिन्। कक्षा १२ पछि विदेशमा काम गरेकी पौडेलले पहिलोपटक नेपालमा जनताको सेवा गर्ने अनुभव पाएको बताइन्। उनले ४० दिनको कामले उनलाई सन्तुष्ट बनाएको र पाएको रकम स्नातक अध्ययनमा खर्च गर्ने योजना रहेको बताइन्।
इलाका प्रहरी कार्यालय रत्ननगरकी सुनिता प्रजा बस्नेतले पनि निर्वाचनमा सहभागी भएर धेरै कुरा सिकेको र अब राज्यले दिएको जिम्मेवारी पूरा गर्न सक्षम भएको अनुभूति पाएको बताइन्। उनले पाएको सुविधालाई व्यवसायमा प्रयोग गर्ने योजना बनाइरहेकी छन्।
खैरहनीको इलाका प्रहरी कार्यालयमा खटिएका सङ्कल्प केसीले पनि शान्तिपूर्ण निर्वाचन सम्पन्न गर्ने जिम्मेवारी पाउँदा उत्साह बढेको बताए। उनले आवश्यक परे राज्यले दिएको अन्य जिम्मेवारी पनि सम्हाल्न तयार रहेको उल्लेख गरे।
जिल्लामा यस निर्वाचनमा दुई हजार ७६६ निर्वाचन प्रहरी परिचालन गरिएको थियो, जसमा नेपाल प्रहरी २,४४१ र सशस्त्र प्रहरी ३२५ थिए। उनीहरुलाई बिहीबार एक कार्यक्रमबीच बिदाइ गरिएको थियो।
प्रमुख जिल्ला अधिकारी गणेश अर्यालले निर्वाचन प्रहरीको भविष्य उज्ज्वल बनाउन सरकारले सिटिइभिटी र गृह मन्त्रालयसँग सहकार्य गरी दुई चरणमा व्यावसायिक तालिम दिने योजना बनाएको जानकारी दिए। सिटिइभिटीमार्फत वर्षेनी एक हजार २०० जनाको तालिम व्यवस्था गरिनेछ।
