काठमाडौं ।चितवन राष्ट्रिय निकुञ्जले आफ्नो क्षेत्रभित्र वन्यजन्तुको आवश्यकतालाई ध्यानमा राख्दै पोखरी निर्माण तथा मर्मतको काम सुरु गरेको छ।
हरेक वर्ष गर्मी याममा वन्यजन्तुलाई पानीको सहज उपलब्धता गराउन निकुञ्जभित्र पोखरी निर्माण र मर्मत गरिँदै आएको छ। निकुञ्जका सूचना अधिकारी अविनाश थापामगरका अनुसार जनावरलाई पानी उपलब्ध गराउने, जलचर जनावरका लागि बासस्थान सिर्जना गर्ने तथा घाँसेमैदान सिँचाइका लागि पोखरी निर्माण गरिन्छ।
उनका अनुसार यस वर्ष तीन वटा नयाँ पोखरी निर्माण र चार वटा पुराना पोखरी मर्मत गर्ने योजना बनाइएको छ। वन्यजन्तुको बासस्थानको अवस्थालाई आधार मानेर पोखरी
निर्माण तथा मर्मतको काम अघि बढाइने उनले बताए ।
निकुञ्जभित्र हाल ५६ वटा पोखरी तथा तालतलैया रहेका छन्। ती सबै स्थानमा एकैपटक सरसफाइ गर्न सम्भव नभएकाले महत्वपूर्ण स्थानमा रहेका पोखरी र ताललाई प्राथमिकतामा राखेर निर्माण तथा मर्मतको काम गरिने निकुञ्जले जनाएको छ।
निकुञ्जमा एकसिङ्गे गैँडा, पाटेबाघ, भालु, चित्तल र हात्ती लगायतका वन्यजन्तुको बासस्थान रहेको छ। गर्मी बढ्दै जाँदा वन्यजन्तुलाई पानीको आवश्यकता बढी हुने भएकाले पोखरी निर्माणले उनीहरूलाई पानी उपलब्ध गराउन सहयोग पुग्ने निकुञ्जको भनाइ छ।
यसबाट पानीको खोजीमा वन्यजन्तु समुदायमा पस्ने सम्भावना पनि कम हुने विश्वास गरिएको छ। निकुञ्जका अनुसार घाँसेमैदान व्यवस्थापनका लागि करिब ९५२.६३ हेक्टर क्षेत्रफलमा नियन्त्रित डढेलो लगाउने कामसमेत सुरु गरिएको छ।
