काठमाडौँ। जेनजी आन्दोलनका क्रममा विभिन्न मुद्दामा फरार रहेका दुई जनालाई प्रहरीले पक्राउ गरेको छ।
नेपाल प्रहरीको केन्द्रीय अनुसन्धान ब्युरो (सिआइबी) को टोलीले जबर्जस्ती करणी तथा सरकारी कागजछाप र दस्तखत कीर्ते सम्बन्धी मुद्दामा फरार रहेका दुई जनालाई पक्राउ गरी आज सार्वजनिक गरेको हो।
पक्राउ पर्नेमा सिन्धुपाल्चोक पाँचपोखरीका ३० वर्षीय नुमेश वाइबा र खोटाङ बराहपोखरीका ४१ वर्षीय नवराज लुइँटेल रहेका छन्। ब्युरोका प्रवक्ता प्रहरी वरिष्ठ उपरीक्षक (एसएसपी) शिवकुमार श्रेष्ठका अनुसार वाइबालाई जबर्जस्ती करणी मुद्दा र लुइँटेललाई सरकारी कागजछाप तथा दस्तखत कीर्ते मुद्दामा पक्राउ गरिएको हो।
प्रहरीका अनुसार वाइबा जेनजी आन्दोलनका क्रममा केन्द्रीय कारागार सुन्धाराबाट फरार भएका थिए भने लुइँटेल जिल्ला अदालत काठमाडौँबाट फरार रहेका थिए।
सिआइबीको टोलीले वाइबालाई काठमाडौँको स्वयम्भु क्षेत्रबाट र लुइँटेललाई वसुन्धराबाट पक्राउ गरेको जनाएको छ।
