काठमाडौं । ट्राफिक प्रहरीले काठमाडौं उपत्यकामा एक सातामा १५ हजार चार सय ४४ सवारीचालकलाई कारबाही गरेको छ । महानगरीय ट्राफिक महाशाखाले १ देखि ८ पुससम्म ट्राफिक नियम उल्लंघन गर्ने १५ हजारभन्दा बढी सवारीचालकलाई कारबाही गरेको हो । महाशाखाका प्रवक्ता एसपी जीवनकुमार श्रेष्ठका अनुसार ट्राफिक प्रहरीको विशेष मोबाइल चेकिङ तथा कारबाही अभियानका क्रममा उनीहरू कारबाहीमा परेका हुन् ।
ट्राफिक व्यवस्थापन थप प्रभावकारी बनाउने, ट्राफिक नियमको पालना गराउने र कानुन कार्यान्वयन गराउने उद्देश्यले विशेष मोबाइल अभियान सञ्चालन गरेको प्रवक्ता श्रेष्ठले बताए । चालकहरूलाई सवारी तथा यातायात व्यवस्था ऐन ०४९ अन्तर्गत कारबाही गरिएको माहाशाखाले जनाएको छ । कारबाहीमा परेकामध्ये सबैभन्दा धेरै ढोका खुला राखेर सवारीसाधन चलाउने चालक छन् । ढोका खुला राखेर चलाउने एक हजार २२ सवारीचालक कारबाहीमा परेका छन् ।
अनधिकृत पार्किङ गर्ने नौ सय ५०, हर्न बजाउने पाँच सय, मादकपदार्थ सेवन गरी सवारी चलाउने सात सय ९०, लेन अनुशासन पालना नगर्ने सात सय ९९, जथाभावी यात्रु ओराल्ने र चढाउने ६ सय ७० चालक कारबाहीमा परेका छन् ।
साथै, एकतर्फी सडकमा सवारीसाधन चलाउने एक सय ८९, जथाभावी सवारी मोड्ने २ सय २९, बढी भाडा लिने ट्याक्सीचालक दुई सय ४४, क्षमताभन्दा बढी यात्रु चढाउने २८ सार्वजनिक यातायात, सिसिटिभी निगरानीका क्रममा ट्राफिक नियम उल्लंघन गर्ने पाँच सय २९ चालकलाई कारबाही गरेको माहशाखाले जानकारी दिएको छ । नयाँ पत्रिका दैनिकबाट
