काठमाडौं । नेकपा एमालेका नेता राजन भट्टराईले प्रतिनिधिसभा निर्वाचनअन्तर्गत काठमाडौं ४ बाट आफ्नो पराजय स्वीकार गर्नुभएको छ ।
मतगणना जारी रहे पनि मतान्तर धेरै भएकाले आफूले हार स्वीकार गरेको उहाँको भनाइ छ।
विजयोन्मुख रास्वपाको पुकार बमलाई उहाँले बधाई दिँदै आगामी दिनमा म क्षेत्रबाट आगामी कुनै पनि निर्वाचनमा उम्मेदवार नबन्ने पनि जानकारी गराउन भएको छ ।
उहाँले लेख्नुभएको छ
आदरणीय काठमाडौं क्षेत्र नं ४ का मतदाता महानुभावहरू,
नमस्कार।
म यहाँहरूका बीच सूर्य चिन्ह लिएर निर्वाचनमा आएको थिएँ। तर यसपटक पनि यहाँहरूको विश्वास जित्न सकिन। लोकतन्त्रमा जनअभिमत नै अन्तिम र सर्वोच्च हुन्छ भन्ने मान्यतालाई आत्मसात् गर्दै यस निर्वाचनको परिणामलाई पूर्ण सम्मानका साथ स्वीकार गर्दछु।
विजयउन्मुख मित्र तथा सम्बन्धित दललाई हार्दिक बधाई ज्ञापन गर्दछु।
निर्वाचनका क्रममा सहयोग, साथ र समर्थन दिनुहुने पार्टीका कार्यकर्ता, समर्थक, शुभेच्छुक तथा सम्पूर्ण जनसमुदायप्रति हार्दिक धन्यवाद तथा आभार व्यक्त गर्न चाहन्छु।
मलाइ थाहा छ, राजनीतिमा पराजय अन्तिम सत्य होइन, यो आत्मसमीक्षा र नयाँ पाठ सिक्ने अवसर पनि हो। इतिहासले पनि यही देखाएको छ। आत्मसमीक्षा, सुधार र जनतासँगको सम्बन्धलाई पुन: सुदृढ गर्दै अघि बढ्दा फेरि जनताको विश्वास जित्न सफल भइन्छ। लोकतान्त्रिक यात्रामा धैर्यता, आत्ममूल्यांकन र निरन्तरताको सधैं महत्व रहन्छ र हामी यसलाई आत्मसाथ गरि नै रहने छौं।
र अन्त्यमा मेरो ब्यक्तिगत निर्णयस म क्षेत्रबाट आगामी कुनै पनि निर्वाचनमा उम्मेदवार नबन्ने पनि यसै समयमा यहाँहरूलाई जानकारी गराउन चाहन्छु।
यहाँहरूले दर्शाउनुभएको साथ, माया र विश्वासप्रति सधैं कृतज्ञ रहनेछु।
धन्यवाद।
राजन भट्टराई
चाबहिल, काठमाडौं–४
