प्रधानमन्त्री तथा परिषद्को कार्यालयले पूर्वनिर्णयअनुसार २५ हजारमाथिका बिलको विवरण सार्वजनिक गर्न सुरु गरेको छ । बुधबार ६ वटा बिल वेबसाइटमा राखिएका छन् । सरकारी कार्यालयहरूले २५ हजारमाथिका बिल वेबसाइटमार्फत ७२ घन्टा सार्वजनिक गर्नुपर्ने तत्कालीन प्रधानमन्त्री सुशील कोइरालाका पालामा भएको निर्णय वर्तमान सरकार गठनसँगै बन्द गरिएको थियो ।
बुधबार दिउँसो १ बजेर २३ मिनेटमा गाडीमर्मत, पत्रपत्रिका खरिद, खाजा खर्च र अन्य सामान खरिदका ६ वटा बिल प्रधानमन्त्री तथा मन्त्रिपरिषद् कार्यालयको वेबसाइटमा राखिएको छ । आधा घन्टाको अवधिमा बिलहरू सार्वजनिक गरिएका हुन् ।
अन्य मन्त्रालय, आयोग तथा कार्यालयहरूले भने अझै बिल सार्वजनिक गरेका छैनन् । सरकारी कार्यालयमा हुने अपारदर्शी खर्च नियन्त्रण गर्ने उद्देश्यसहित २५ हजार माथिका सरकारी बिल सार्वजनिक गर्ने निर्णय गरिएको थियो ।
