काठमाडौं । महानगरीय प्रहरी आयुक्तको कार्यालय रानीपोखरीद्वारा घुमवा प्रहरी खारेज गरिएको छ । रानीपोखरीका आयुक्त डीआईजी विश्वराज पोरखेलले आफू मातहत रहेका सूचना संकलन गर्ने २५ जनाको घुमुवा टोली प्रहरी खारेज गरेका हुन् । आयुक्तको कार्यालयका एक अधिकारीले भने,‘‘घुमुवा टोलीका कारण कतिपय अवस्थामा संगठनकै बदनाम पनि भएको छ । आफ्नो जिम्मेवारीभन्दा अन्यन्त्र लाग्ने गरेका पनि थिए । अब सूचनाको जानकारी युनिटहरुबाटै लिन्छौं।’’
रानीपोखरीमा वर्षौदेखि घुमुवा प्रहरी रहदै आएका थिए । कार्यालय प्रमुख फेरिएसँगै सबैले आफूअनुकुल घुमुवाको रुपमा प्रहरी खटाउँदै आएका थिए । अधिकारीका अनुसार संगठनको आन्तरिक शुद्धीकरण गर्नका लागि घुमुवा प्रहरी खारेज गरिएको हो।
आयुक्तको कार्यालय महातत उपत्यकाका तीनवटै जिल्लाका प्रहरी कार्यालय, महानगरीय ट्राफिक, अपराध महाशाखा र विमानस्थल प्रहरी कार्यालय रहने गरेको छ । रानीपोखरीमा कार्यरत घुमुवा प्रहरी खारेज भए पनि मातहतका युनिटमा भने सिभिल प्रहरी रहनेछन् ।
