काठमाडौँ: निर्वाचनमा खटिएका कर्मचारी लैजाने क्रममा आज मुस्ताङ र रामेछापमा भएका सवारी दुर्घटनामा परी ३ जनाको ज्यान गएको छ । आज प्राप्त समाचार अनुसार मुस्ताङमा मोटरसाइकल दुर्घटना हुँदा निर्वाचनमा खटिएका कर्मचारीको मृत्यु भएको छ ।
थासाङ गाउँपालिका–२ खन्तीमा ग ७ प १४८६ नम्बरको मोटरसाइकल दुर्घटना हुँदा मुस्ताङ भन्सार कार्यालयका कर्मचारी ३२ वर्षीय सुनिल घतानेको मृत्यु भएको हो । आइतबार राति ८ बजे दुर्घटनामा परेर गम्भीर भएका घतानेको उपचारका लागि प्रदेश अस्पताल मुस्ताङ ल्याउँदा मृत्यु भएको जिल्ला प्रहरी कार्यालय मुस्ताङका प्रमुख प्रहरी नायव उपरीक्षक छिरिङकिप्पा लामाले जानकारी दिइन् ।
उता रामेछापमा भएको गाडी दुर्घटनामा परेर दुई जना कर्मचारीको निधन भएको छ । निर्वाचन सामग्री तथा कर्मचारी लिएर गइरहेको ट्रक रामेछापमा दुर्घटनामा पर्दा एकजना मतदान अधिकृत डोरप्रसाद घिमिरे र अर्का एकजना नेपाल प्रहरीका असइ आरपी यादवको ज्यान गएको छ । घिमिरे रामेछाप नगरपालिका –२ साँघुटार वडा कार्यालय भवन ‘ख’ मतदान केन्द्रका मतदान अधिकृत थिए र उनी मन्थली नगरपालिका –७ स्थित रुद्राक्षेश्वर माध्यमिक विद्यालयका शिक्षकसमेत रहेको खुलेको छ ।
सोमबार अपरान्ह निर्वाचन सामग्री तथा कर्मचारी लिएर गइरहेको निशान ट्रक रामेछाप नगरपालिका–२ स्थित वडा कार्यालय नजिकैको सिरुवारी भिरबाट खसेको थियो । दुर्घटनामा घाइते भएका ६ जनाको मन्थली अस्पतालमा उपचार पछि काठमाडौँ ल्याइएको छ ।
रामेछाप दुर्घटनामा गम्भिर घाईते भएका ७ जना ९महिला ३, पुरुष ४० लाई नेपाली सेनाको हवाई साधनद्वारा काठमाडौँ ल्याईएको सैनिक जनसम्पर्क निर्देशनालयले जनाएको छ ।
