काठमाडौँ । सुगमताका हिसाबले राजधानीको सहरी क्षेत्र रहेर पनि न्यूनतम आधारभूत खानेपानी, ढल निकास, डुबान र गुठीसम्बन्धी समस्या झेलिरहेको काठमाडौँ निवार्चन क्षेत्र नं ७ का उम्मेदवारले मतदाताका यिनै माग र मुद्दालाई सम्बोधन गर्ने प्रतिबद्धता व्यक्त गर्नुभएको छ ।

आगामी फागुन २१ गते हुने प्रतिनिधिसभा सदस्य निर्वाचनको तयारी गरिरहनुभएका राजनीतिक दल र उम्मेदवारहरु मतदातासँगको भेटघाटमा स्थानीयले उठाएका आधारभूत आवश्यकता र पूर्वाधार निर्माणसम्बन्धी समस्यालाई प्राथमिकताका साथ सम्बोधन गर्न पहल गर्ने आश्वासन दिइरहनुभएको छ ।

यस निर्वाचन क्षेत्रबाट विसं २०७९ मा राष्ट्रिय स्वतन्त्र पार्टी (रास्वपा) का गणेश पराजुली विजय हुनुभएको थियो । उहाँ आठ हजार ७४३ मतले विजयी हुनुभएको थियो । उहाँका निकटम प्रतिद्वन्द्वी नेपाल कम्युनिष्ट पार्टी(एमाले) का श्यामकुमार घिमिरेले छ हजार ८०० मत ल्याउनुभएको थियो । सोही क्षेत्रबाट पराजुलीले पुनः उम्मेदवारी दिनुभएको छ ।

आगामी निर्वाचनका लागि काठमाडौँ क्षेत्र नं ७ बाट प्रत्यक्षतर्फ नेपाल कम्युनिष्ट पार्टी(एमाले) का प्रकाश श्रेष्ठ, नेपाली कांग्रेसका प्रमोदहरि गुरागाईं, नेपाली कम्युनिष्ट पार्टीका वसन्तप्रसाद मानन्धर, राष्ट्रिय स्वतन्त्र पार्टीका गणेश पराजुली, राष्ट्रिय प्रजातन्त्र पार्टीका लालकुमार लामा, जनता समाजवादी पार्र्टी नेपालका बाबुराम लामा, राष्ट्रिय जनमोर्चाका दीर्घकुमार श्रेष्ठ, नेपाल कम्युनिष्ट पार्टी(संयुक्त) का गुणबहादुर बञ्जारा क्षेत्री, नेपाल मजदुर किसान पार्टीकी गणेश माया डङ्गोल चुनावी दौडमा हुनुहुन्छ ।

यसैगरी प्रगतिशील लोकतान्त्रिक पार्टीका अमिनरत्न ताम्राकार, राष्ट्रिय एकता दलका विनोदकुमार गुरुङ, जय मातृभूमि पार्टीका वैकुण्ठ फुयाँल, श्रम संस्कृति पार्टीका मणिराम बहादुर प्रधान, नेपाल कम्युनिष्ट पार्टी(माओवादी) दीपक मानन्धर, उज्यालो नेपाल पार्टीकी विमला लामा, राष्ट्रिय मुक्ति पार्टी नेपाल(एकल चुनाव चिह्न)का दिपीन पन्त र आमजनता पार्टी (एकल चुनाव चिह्न) प्रदीप भट्टराई चुनावी प्रतिस्पर्धामा हुनुहुन्छ ।

यसैगरी, स्वतन्त्रतर्फ १० जनाको उम्मेदवार चुनावी मैदानमा हुनुहुन्छ । सविता गमाल, सुजिता श्रेष्ठ, अञ्जला बज्राचार्य, पुष्प बानियाँ, शर्मिला फुयाँल, सुमन पुतुवार/महर्जन, अमन श्रेष्ठ, बुद्धिप्रसाद रेग्मी, भरत पौडेल र प्रकाश कुँवर चुनावी प्रतिस्पर्धामा होमिनुभएको छ ।

यस निर्वाचन क्षेत्रमा काठमाडौँ महानगरपालिका, तारकेश्वर र नागार्जुन नगरपालिकाका १० वटा वडा पर्छन् । महानगरका १६, १७, १८, २५ वडाका बालाजु, क्षेत्रपाटी, नयाँबजार, सोह्रखुट्टे, ठमेल, म्हैपि, धोबीचौर, ठहिटी, भुरुञ्खेल, ढल्को, नरदेवी, न्हयौखा, मछिन्द्रटोल तथा तारकेश्वर नगरपालिकाका–३, ४, ५ का तीनपिपले, गोलढुङ्गा, लोलाङ र नागार्जुन नगरपालिकाका– १, २, ३ का रानीवन, ठूलोभ¥याङ, गैरीगाउँ यस क्षेत्रमा पर्छन् ।

यस क्षेत्रमा ७८ वटा मतदान केन्द्र रहेका छन् भने मतदाता सङ्ख्या ६७ हजार ४११ छ । काठमाडौँ क्षेत्र ७ की निर्वाचन अधिकृत सविता शर्माले निर्वाचन आचारसंहितासम्बन्धी छलफल गरिरहेको जानकारी गराउँदै निर्वाचन प्रचारप्रसार व्यवस्थित तुल्याउन सर्वपक्षीय र सर्वदलीय छलफल आयोजना गरिएको बताउनुभयो । उहाँका अनुसार यस क्षेत्रबाट २७ जना उम्मेदवारमा १० जना स्वतन्त्र रहनुभएको छ भने साथै पाँच जना महिला उम्मेदवार हुनुहुन्छ ।

उज्यालो नेपाल पार्टीबाट प्रत्यक्षतर्फका उम्मेदवार विमला लामाले जनताको काम गर्ने उद्देश्यले उम्मेदवारी दिएको उल्लेख गर्दै शिक्षा, स्वास्थ्य, बेरोजगारी अन्त्य, पर्यटन प्रवद्र्धन र भ्रष्टाचारमुक्त देश बनाउने आफ्नो प्रमुख एजेन्डा रहेको बताउनुभयो । महिला उद्यमीसमेत रहनुभएकी लामाले भन्नुभयो, “महिलाले प्रत्यक्षतर्फ उम्मेदवारी दिने आँट गर्दैनन् । अवसर पनि दिँइदैन । अध्याँरो राजनीतिलाई उज्यालो बनाउनेतर्फ लाग्नुस् भनेर मतदाताले हौसला दिनुभएको छ ।”

रास्वपाका उम्मेदवार पराजुलीले मतदाताले भविष्यको बाटो कोर्न, सुशासन कायम गर्न, नीतिनियम बनाउनमा ध्यान केन्द्रित गर्न सुझाव दिएको बताउनुभयो । उहाँले जनताहरुले राजनीतिक स्थायित्व चाहेको बताउँदै जनताका आशा र विश्वासलाई यथार्थमा परिवर्तन गर्न आसन्न चुनाव पर्खिरहेको प्रतिक्रिया दिनुभयो ।

नेपाल कम्युनिष्ट पार्टी(एमाले) का उम्मेदवार प्रकाश श्रेष्ठले आफ्नो निर्वाचन क्षेत्रलाई सांस्कृतिक नगरीका रुपमा अघि बढाउन सम्पदा संरक्षण र पुनःनिर्माणको एजेन्डालाई निरन्तरता दिने बताउनुभयो । उहाँले जनतासँगको समन्वय र सहकार्यमा स्थानीय आवश्यकता खानेपानी, ढल निकास, डुबान क्षेत्र, सांस्कृतिक सम्पदा, बाजागाजा संरक्षणलगायत प्राथमिकतामा राखेको बताउनुभयो ।

यसअघि बागमती प्रदेशसभा सदस्यसमेत रहिसक्नुभएका नेपाली कम्युनिष्ट पार्टीका उम्मेदवार वसन्तप्रसाद मानन्धरले विकाससँग जोडेर कानुन निर्माणमा ध्यान दिने जनतासामु प्रतिबद्धता गरेको बताउनुभयो । उहाँले पहिला पनि जनप्रतिनिधिका रुपमा काम गरिसकेका हुनाले जनताले विश्वास गरेको र मत आफ्नो पक्षमा हुने विश्वास व्यक्त गर्नुभयो ।

आगामी हुने निर्वाचनमा हुने प्रतिनिधिसभा सदस्य निर्वाचनका लागि पहिलो हुने निर्वाचित हुने (प्रत्यक्ष) निर्वाचन प्रणालीतर्फ ६५ राजनीतिक दलले ६१ निर्वाचन चिह्नमा प्रतिस्पर्धा गर्दैछन् । प्रत्यक्षतर्फ तीन हजार ४०६ उम्मेदवार प्रतिस्पर्धामा हुनुहुन्छ । त्यस्तै सामानुपातिक निर्वाचन प्रणालीतर्फ ६३ राजनीतिक दलले ५७ निर्वाचन चिन्हमा चुनाव लड्दैछन् ।

यसपटकको निर्वाचनका लागि मुलुकभर ९२ लाख ४० हजार १३१ महिला, ९६ लाख ६३ हजार ३५८ पुरुष र २०० अन्य गरी कुल करोड ८९ लाख तीन हजार ६८९ मतदाता कायम छन् ।