काठमाडौँ । काठमाडौँ महानगरपालिकाका मेयर बालेन शाहले माघे संक्रान्तिको अवसरमा शुभकामना व्यक्त गर्दै यो पर्व प्रकृति फेरिने दिन मात्र नभई नेपाली विविधताको संगम भएको बताएका छन्।
मंगलबार सामाजिक सञ्जाल फेसबुकमार्फत शुभकामना सन्देश दिँदै मेयर शाहले नेपालको बहुसांस्कृतिक एकतालाई जोड दिएका हुन्। उनले चर्चित गीतको अंश ‘सय थरि बाजा एउटै ताल, सय थरि गोडा एउटै चाल, सब हो एउटै हामी नेपाली, एउटै हाम्रो देश नेपाल’ उद्धृत गर्दै नेपालीपनको भाव प्रस्तुत गरेका छन्।
शाहले माघ १ गते सूर्य धनु राशिबाट मकर राशिमा प्रवेश गर्ने भएकाले यस दिनलाई मकर संक्रान्ति, तिलुवा संक्रान्ति वा माघीका रूपमा मनाइने उल्लेख गरेका छन्। साथै, नेपालका विभिन्न समुदायले यस दिनलाई आ–आफ्नै सांस्कृतिक परम्पराअनुसार मनाउने तथ्यसमेत समेटेका छन्।
उनका अनुसार नेवार समुदायले यस पर्वलाई ‘घ्यः चाकु संल्हू’ का रूपमा मनाउँछन् भने किरात समुदायले नयाँ वर्षका रूपमा ‘येले संवत्’ मनाउँछ। त्यसैगरी, थारू समुदायको मौलिक संस्कृतिले भरिएको सबैभन्दा ठूलो पर्व माघी भएको पनि उनले स्मरण गराएका छन्।
चाडपर्व मनाउने नाम र शैली फरक भए पनि सबै नेपालीको भावना एउटै रहेको उल्लेख गर्दै मेयर शाहले विविधताबीचको एकता नै नेपाली समाजको शक्ति भएको बताए। उनले सबै नेपाली जोडिने, रमाउने र उत्सव मनाउने तरिका फरक भए पनि अन्ततः सबै एकै भएको सन्देश दिँदै नयाँ सुरुवात, एकता र समृद्धिको कामना गरेका छन्।
