काठमाडौं । भारतको हिमाञ्चल प्रदेशमा ग्यास सिलिन्डर विष्फोटपछि आगलागी हुँदा नेपालीसहित ६ जना बेपत्ता भएका छन् ।
सोलन जिल्लाको अर्कीमा ग्यास सिलिन्डर विष्फोट हुँदा ३ जनाको मृत्यु भएको छ भने नेपालीसहित ६ जना बेपत्ता भएका हुन् ।
सल्यानको सिद्ध कुमाख गाउँपालिका-२ का अध्यक्ष मेकबहादुर बुढाथोकीले मंगलबार विज्ञप्ति जारी गर्दै उक्त घटनामा आफ्नो वडाका दुई परिवारका गरी ९ जनाको मृत्यु भएको दाबी गरेका छन् ।
वडाध्यक्ष बुढाथोकीले घटनाप्रति दुःख व्यक्त गर्दै वडामा शोक विदा समेत दिएका छन् ।
दिल्लीस्थित नेपाली दूतावासले भने घटनामा केही नेपाली पनि परेको भन्ने सूचना पाएको बताएको छ । उक्त उक्त घटनामा केही नेपाली परेको भन्ने सूचना आएको र यसबारेमा भारतीय प्रहरीसँग समन्वय भईरहेको दूतावासका प्रहरी सहचारी एसएसपी प्रकाश मल्लले जानकारी दिए ।
भारतीय अधिकारीहरूले उक्त घटनामा ३ जनाको शव फेला परेको र घटनामा केही नेपाली र बिहारका मानिस परेको हुन सक्ने आशंका गरेको छ ।
