काठमाडौँ। पूर्वनिर्वाचन आयुक्त दिनेश थपलियाले निर्वाचनका बेला पत्रकारले कुनै पनि दबाब, प्रभाव वा पूर्वाग्रहबिनै स्वतन्त्र र निष्पक्ष रूपमा कलम चलाउनुपर्नेमा जोड दिनुभएको छ ।
सेन्टर फर पोलिसी रिसर्चले आज यहाँ आयोजना गरेको ‘निर्वाचनमा चौथो अङ्ग ः अनुसन्धानात्मक पत्रकारिता’ विषयक विमर्श तथा अन्तरक्रियामा उहाँले पत्रकारले स्वतन्त्र रूपमा कलम चलाए निर्वाचन शान्तिपूर्ण, निष्पक्ष र विश्वसनीय हुने बताउनुभयो ।
पूर्वआयुक्त थपलियाले निर्वाचन गराउने निकायबारे समाचार सम्प्रेषण गर्दा स्पष्टता आवश्यक रहेको उल्लेख गर्दै निर्वाचन संविधानबमोजिम हुनुपर्नेमा जोड दिनुभयो । उहाँले सञ्चारमाध्यमले निर्वाचन प्रक्रियामा हुने कमजोरी, अनियमितता तथा सम्भावित जोखिमबारे तथ्यमा आधारित अनुसन्धानात्मक सामग्री प्रकाशन गर्न सके लोकतन्त्र थप मजबुत हुने धारणा राख्नुभयो ।
नेपाल प्रेस काउन्सिलका पूर्वअध्यक्ष तथा वरिष्ठ पत्रकार किशोर श्रेष्ठले निर्वाचनका समयमा पत्रकारले भोग्नुपर्ने व्यावसायिक चुनौती, समस्या तथा आचारसंहिताका विषयमा चर्चा गर्नुभएको थियो । उहाँले निर्वाचनमा पत्रकारले समाचार सङ्कलन तथा प्रकाशन गर्दा आचारसंहिता, कानुनी सीमा र सामाजिक उत्तरदायित्वलाई विशेष ध्यान दिनुपर्नेमा जोड दिनुभयो ।
सेन्टर फर पोलिसी रिसर्चका अध्यक्ष सीताराम भट्टराईले अन्तरक्रियाले निर्वाचन प्रक्रियामा पत्रकारिताको चौथो अङ्गको भूमिकालाई थप स्पष्ट पार्नुका साथै पत्रकारहरूलाई जिम्मेवार, तथ्यपरक र अनुसन्धानमुखी पत्रकारिता गर्न प्रेरित गरेको बताउनुभयो ।रासस
