काठमाडौँ । नेपालमा एचआईभी संक्रमितको संख्या ३४ हजार ३ सय ३७ जना रहेका छन् ।
आईतवार विश्व एड्स दिवसको अवसरमा आयोजित अन्तरक्रिया कार्यक्रममा बोल्दै राष्ट्रिय एड्स तथा यौन रोग नियन्त्रण केन्द्रका निर्देशक डा. सर्वेश शर्माले यसबारे जानकारी गराउनुभएको हो ।
उहाँकाअनुसार कुल संक्रमितमध्ये १५ वर्ष भन्दा माथिका ३३ हजार २ सय ७९ जना रहेका छन् । त्यस्तै १५ वर्ष माथिका १४ हजार जना महिलाहरुमा एचआइभी संक्रमण छ । उहाँले १५ वर्ष भन्दा माथिका एचआइभी संक्रमित पुरुषहरुको संख्या १९ हजार २ सय ७९ रहेको छ । एक हजार ५८ जना एचआइभी पोजेटिभ बालबालिकाहरु रहेका छन् । गत एक वर्षमा आमालाई एचआइभी परीक्षण गर्दा २ सय २७ जना बालबालिकाहरु संक्रमित फेला परेका छन् । सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको डा. शर्माले बताउनु भयो । सरदर दिनमा १.७ जना नयाँ संक्रमित थपिरहेका छन् भने दिनमा एक जनाको एचआइभीका कारण मृत्यु भइरहेको छ ।
उहाँले भन्नुभयो, ‘३४ हजार ३ सय ३७ जना नेपालमा एचआइभीको संक्रमित हुनसक्छ भन्ने आँकलन गरिएको छ । यसमा १५ वर्ष भन्दा माथिका ३३ हजार २ सय ७९ जना हुनुहुन्छ । महिलाहरुमा १५ वर्ष माथिका लगभग १४ हजार जना हुनुहुन्छ । १५ वर्ष भन्दा माथिका पुरुषहरुको कुरा गर्दा १९ हजार २ सय ७९ जना हुनुहुन्छ । बच्चाहरुको कुरा गर्ने हो भने लगभग एक हजार ५८ जना एचआइभी पोजेटिभ हुनुभएको छ भन्ने आँकलन छ । आमालाई एचआइभी टेस्टिङ गर्दा २ सय २७ जना बच्चाहरुमा पोजेटिभ हुनसक्छ भन्ने आँकलन छ । सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको छ । तर अझै हामी ९० प्रतिशतसम्म पुग्नुपर्नेछ । सरदर दिनमा एउटा जस्तो वा १.७ जना नयाँ क्लाइन्टहरु थपिने अवस्था छ । मृत्युको दरको कुरा गर्ने हो भने लगभग दिनमा एउटा जस्तो एचआइभीको कारणले मृत्यु हुने गर्दछ ।’
डा. शर्माकाअनुसार ८८ प्रतिशत संक्रमितहरु औषधिको सेवन गरिरहनुभएको छ । संक्रमितहरुमध्ये ७६ प्रतिशतले शरीरमा भाइरसको मात्रा कति छ भनेर परीक्षण गरिरहेको बताउनु भयो । आगामी एक वर्षभित्र एचआइभी संक्रमण विरुद्धको रणनीति बनाउनुपर्ने आवश्यकता रहेको उहाँले बताउनु भयो ।
