काठमाडौँ । उडान सञ्चालन सम्बन्धी सुरक्षा नियम उल्लंघन गरेको भन्दै नेपाल नागरिक उड्डयन प्राधिकरणले नेपाल वायुसेवा निगमका दुई पाइलटलाई ग्राउन्डेड गरेको छ।
प्राधिकरणको फ्लाइट अपरेसन डिभिजनले शुक्रबार निगमलाई पत्राचार गर्दै वाइडबडी विमानका क्याप्टेन विजय लामा र क्याप्टेन सोनी राणालाई कारबाहीस्वरूप अर्को निर्णय नआएसम्मका लागि उडान ड्युटीबाट हटाउन निर्देशन दिएको हो।
उडानमा रहेर फोटो तथा भिडियो खिचेको अभियोगमा दुवै पाइलटलाई रोस्टर–अफ गरिएको पत्रमा उल्लेख छ।
निगमको फ्लाइट अपरेसन डिभिजन प्रमुख पाइलट संगम कार्कीले हस्ताक्षर गरेको निर्देशन अनुसार, उनीहरूलाई अर्को सूचना जारी नभएसम्म सक्रिय उडानमा सहभागी गराउन नहुने स्पष्ट गरिएको छ।
नेपालका प्रचलित उड्डयन सुरक्षा नियमअनुसार ककपिटमा अनधिकृत गतिविधि, विशेषगरी उडान क्रममा फोटोरभिडियोग्राफी गर्नु सुरक्षा मानकविरुद्ध मानिन्छ।
युट्युबरसमेत रहेका क्याप्टेन विजय लामामाथि यसअघि पनि यस्तै आरोपमा कारबाही भइसकेको छ।
प्राधिकरणले उनलाई यसै अभियोगमा चौथो पटक कारबाही गरेको हो। १८ महिनाअघि यस्तै गतिविधिका कारण ग्राउन्डेड भएका लामा माफी मागेपछि उडान अनुमति फुकुवा गरिएको थियो।
प्राधिकरणका अनुसार क्याप्टेन लामाले टेकअफ तथा ल्याण्डिङका बेला समेत भिडियोग्राफी गरेको गुनासो प्राप्त भएकाले यसबारे थप छानबिन अघि बढाइने बताइएको छ।
