काठमाडौँ । आगामी फागुन २१ गते तय भएको प्रतिनिधिसभा निर्वाचनमा भाग लिन नेकपा एमाले र राप्रपाले निर्वाचन आयोगमा दल दर्ता गराएका छन्।
आज (मंगलवार) एमालेका निर्वाचन विभाग प्रमुख निरज आचार्य र राप्रपाका तर्फबाट केदारबहादुर अधिकारीले दल दर्ताको निवेदन आयोगमा बुझाएका हुन्। निर्वाचन कार्यतालिका अनुसार मंसिर १० गतेसम्म दल दर्ता गराउने समय तोकिएको छ।
एमाले र राप्रपाले समेत दर्ता गराएपछि आगामी फागुन २१ गते हुने उक्त आमनिर्वाचनका लागि हालसम्म आयोगमा दर्ता रहेका ६७ राजनीतिक दलले चुनावमा भाग लिन दल दर्ताका लागि निवेदन दिएको आयोगका प्रवक्ता नारायणप्रसाद भट्टराईले जानकारी दिए ।
यसैबीच, प्रतिनिधिसभा पुनर्स्थापनाको मुद्दा उठाइरहेको नेकपा एमालेले आजै सर्वोच्च अदालतमा प्रतिनिधिसभा विघटनविरुद्ध रिट पनि दायर गरेको छ।
