काठमाडौँ । प्रधानमन्त्री सुशीला कार्कीविरुद्ध दर्ता भएको अदालत अवहेलना मुद्दाको सुनुवाइका लागि सर्वोच्च अदालतले पेसी तोकेको छ।
अघिल्लो सरकारद्वारा नियुक्त ११ देशका राजदूतलाई फिर्ता बोलाउने वर्तमान सरकारको निर्णयविरुद्ध सर्वोच्चले जारी गरेको अन्तरिम आदेश कार्यान्वयन नगरेको भन्दै अधिवक्ता प्रतिभा उप्रेती र प्रेम सिलवालले दायर गरेको अवहेलनाको निवेदनमा सुनुवाइ तय भएको हो।
उक्त निवेदनमा न्यायाधीश हरिप्रसाद फुयाँल र न्यायाधीश अब्दुल अजिज मुसलमानको संयुक्त इजलासमा सुनुवाइ हुनेछ। सर्वोच्चका न्यायाधीशद्वय सारंगा सुवेदी र श्रीकान्त पौडेलको इजलासले कात्तिक १६ गते राजदूत फिर्ता बोलाउने सरकारी निर्णय तत्काल कार्यान्वयन नगरी यथास्थितिमा राख्न अन्तरिम आदेश जारी गरेको थियो।
अदालतको आदेशपछि सरकारले सम्बन्धित राजदूतहरूलाई परराष्ट्र मन्त्रालयमै हाजिर हुन निर्देशन दिएको थियो। हाल सबै राजदूतहरू परराष्ट्र मन्त्रालयमै हाजिर रहेका छन्।
