काठमाडौं । प्रधानमन्त्री सुशीला कार्कीको मन्त्रीमण्डलले अझैसम्म पनि पूर्णता पाएको छैन ।
प्रधानमन्त्रीले तेस्रोपटक मन्त्रिपरिषद विस्तार गर्न लागेको भनिएपछि अहिलेसम्म विस्तार हुन सकेको छैन । समयमै मन्त्रीमण्डलले पूर्णता नपाउँदा मन्त्रालयहरू मन्त्रीविहीन रहेका छन् ।
यसैबिच बिहीबार सिंहदरबार परिसरमा एक पत्रकारले प्रधानमन्त्री कार्कीलाई मन्त्रिपरिषद विस्तारको विषयमा जिज्ञासा राख्दा उनले झर्को मानेकी छिन् । ‘प्रधानमन्त्रीज्यू मन्त्रिपरिषद् कहिले विस्तार हुन्छ ?’ भन्ने पत्रकारको प्रश्नमा उनले नरोकिई जवाफ फर्काइन्– ‘मन्त्रिपरिषद् विस्तार भ’को भई छ’ ।
२३ र २४ भदौको जेनजी आन्दोलनपछि २७ भदौमा कार्की प्रधानमन्त्री नियुक्त भएकी थिइन् । उनले ३० भदौमा पहिलोपटक मन्त्रिपरिषद् विस्तार गर्दा कुलमान घिसिङ, ओमप्रकाश अर्याल र रामेश्वर खनाललाई मन्त्रीमा नियुक्त गरेकी थिइन् ।
त्यसपछि दोस्रो पटक ६ असोजमा उनले ४ मन्त्री थप्दै मन्त्रिपरिषद् विस्तार गरेकी थिइन् । प्रधानमन्त्री कार्की स्वयमले ९ वटा मन्त्रालय सम्हाली रहेकी छन् ।
