काठमाडौं । सुदूरपश्चिम प्रदेश सरकारले त्यस क्षेत्रमा पछिल्लो समयमा कोरोनाका संक्रमित बढ्दै गएको भन्दै लकडाउनको अवधि लम्ब्याउन माग गरेको छ । उसले केन्द्र सरकारलाई सो सिफारिस गरेको हो।
शनिबार मात्र कैलालीको एक स्थानीय व्यक्तिमा कोरोना संक्रमण पुष्टि भएपछि प्रदेश सरकारको उच्चस्तरीय समितिले लकडाउनको अवधि लम्ब्याउने निष्कर्ष निकालेको छ । यसअघि विदेशबाट नेपालमा आएका नागरिकामा मात्र संक्रमण देखिएकोमा कैलालीमा भने पहिलो पटक एक नेपालीबाटै अर्काेमा सरेको पाइएको छ । त्यसपछि सुदूरपश्चिम क्षेत्रमा तनाव उत्पन्न भएको प्रदेश सरकारले जनाएको छ ।
सुदूरपश्चिम प्रदेश सरकारका आन्तरिक मामिला मन्त्री प्रकाश शाहले संक्रमण थप फैलिन नदिन लकडाउन अवधि लम्बाउने निष्कर्षसहित केन्द्र सरकारलाई सिफारिस गरिएको बताएका छन् । कोरोना रोकथाम तथा नियन्त्रणको प्रयासमा सरकारले चैत ११ गतेदेखि देशभर लकडाउन गरेको छ । लकडाउनको अवधि यही चैत २५ गते सकिँदैछ ।
लकडाउनको अवधि लम्बिने चर्चा चलिरहेको बेला शनिबार बसेको संघीय मन्त्रिपरिषद बैठकले त्यसबारे कुनै निर्णय नगरे पनि यसको अवधि भोलि एकदिन रहेकोले भोलि नै सरकारले यसबारेमा निर्णय गर्ने बुझिएको छ । बरु संक्रमण थप फैलिन नदिन सरकारले एक स्थानीय तहबाट अर्को स्थानीय तहसम्म आउ–जाउ गर्न रोक लगाउने निर्णय गरेको छ ।
