काठमाडौं । भदौ २३ र २४ गतेका घटनासम्बन्धी जाहेरीका विषयमा प्रहरी र जाँचबुझ आयोगबीच असमझदारी देखिएको छ ।
आयोगले आजको बैठकबाट तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकविरुद्ध परेका जाहेरी प्रहरीमा नै फिर्ता पठाउने निर्णय गरेको हो ।
यसअघि काठमाडौं प्रहरी परिसरले ती जाहेरी दर्ता गर्न अस्वीकार गर्दै विषय आयोगको कार्यक्षेत्रमा पर्ने दाबी गरेको थियो । तर आयोगले फौजदारी अपराधसम्बन्धी अनुसन्धान र अभियोजन आफ्नो अधिकारक्षेत्रमा नपर्ने भन्दै जाहेरी पुनः प्रहरीमा पठाएको हो ।
आयोगले जारी गरेको विज्ञप्तिमा फौजदारी अपराधमा संलग्न जोकोहीलाई सरकारले तत्काल अनुसन्धान र कारबाही गर्न सक्ने कानूनी व्यवस्था रहेको स्पष्ट गरेको छ ।
यससँगै उक्त घटनाको अनुसन्धान जिम्मेवारीबारे प्रहरी र आयोगबीच अझै स्पष्टता नआएको देखिएको छ ।
