काठमाडौँ । नेपाल पर्यटन बोर्डले जेन—जी आन्दोलनले नेपालमा पर्यटन क्षेत्रको मनोबल घटाएको बताएको छ ।
नेपाल पर्यटक बोर्डले सो आन्दोलनमा भएको तोडफोड, आगजनी र लुटपाटको घटनाले नेपालको पर्यटक क्षेत्रको मनोबल घटाएको जानकारी दिएको हो ।
विश्व पर्यटन दिवसको अवसर पारेर शनिवार काठमाडौंमा आयोजित एक कार्यक्रममा बोल्दै बोर्डका प्रमुख कार्यकारी अधिकृत दीपकराज जोशीले सो आन्दोलनका क्रममा तत्काल गत वर्षको तुलनामा पर्यटकको आगमनमा ४५ प्रतिशतले कमी आएको तथ्यांक सार्वजनिक गर्नुभयो । उहाँले गत वर्ष असोजको पहिलो हप्ता पर्यटकको संख्या ३३/३४ सय भएकोमा यस वर्ष जेनजी आन्दोलनको कारण त्यो संख्या घटेर १६ सय पुगेको उल्लेख गर्नुभयो । तर अब थप अरु दुर्घटना नभएको त्यसमा सुधार आउने पर्यटन बोर्डको आँकलन छ ।
प्रमुख कार्यकारी अधिकृत जोशीले भन्नुभयो, ‘यो भदौ २३ र २४ गते जुन आन्दोलन भयो । अलिकति आगजनीका घटनाहरुका कारण पर्यटक आगमनको संख्यामा कमी भयो । त्यसले ठ्याक्कै सिजन शुरु हुँदै गर्दा हामीलाई अलिकति मनोबल खस्काएको अवस्था छ । यहाँहरुलाई जानकारी गराउन पर्दाखेरी सेप्टेम्बरमा हाम्रो एभरेजमा करिव करिव ३३/३४ सय पर्यटकहरु प्रतिदिन आगमन हुन्थ्यो । र, यसको पहिलो हप्ता करिव करिव ३ हजार माथि नै हाम्रो पर्यटकको आगमन संख्या थियो । यो घटनाको दौरान यो हप्तामा त्यो घटेर १६ सय जस्तो पुगेको छ । जुन चाँही करिव ४५ प्रतिशतले डाउन देखिन्छ । पछिल्लो हप्तामा २३ सय जस्तो छ भने अहिले पछिल्लो हप्तामा २ हजार ९ सय भिजिटर्स भएको छ । अव फेरी असहज अवस्था भएन भने हामी रिकभरीतर्फ छौ जस्तो देखिन्छ । यहीबीचमा पर्यटक बोर्ड, सरकारी निकाय, निजी क्षेत्र, विजनेश हाउसहरुबाट एउटा गतिशील म्यासेज दिने काम भएको छ । नेपालमा आउनका लागि पर्यटकलाई म्यासेज दिने काम गरिएको हो ।’
पर्यटन बोर्डले नेपालमा पर्यटन भित्र्याउनका लागि सही सूचना दिने प्रणालीलाई प्रभावकारी बनाइएको पनि दाबी गरेको छ । प्रमुख कार्यकारी अधिकृत जोशीले सूचना प्रणालीको राम्रो व्यवस्थापन गरेर पर्यटकलाई दिगो रुपमा नेपाल भित्र्याउने कामलाई सघन ढंगले अघि बढाइएको बताउनु भयो । त्यसका लागि सरकारी र निजी क्षेत्र दुवैले संयुक्त रुपमा पहल गर्नुपर्ने उहाँको भनाई छ ।
