काठमाडौं । प्रतिनिधि सभा रुपन्देही–३ मा आगामी कात्तिक १७ गते हुने उपनिर्वाचनका लागि राष्ट्रिय स्वतन्त्र पार्टी (रास्वपा)का आकांक्षीहरू पार्टी सभापति रवि लामिछानेलाई भेट्न नख्खु पुगेका छन् ।
पार्टीले आधिकारिक उम्मेदवार घोषणा गर्नुअघि ९ जना आकांक्षीहरू सभापति लामिछानेलाई भेट्न ललितपुरस्थित नख्खु कारागार पुगेका हुन् ।
सहकारी ठगी प्रकरणमा पुर्पक्षका लागि थुनामा रहेका लामिछाने भैरहवा कारागारबाट केही समयअघि मात्रै नख्खु सारिएको थियो ।
रास्वपाले आज दिउँसो साढे १ बजे सचिवालय बैठक बोलाएको छ । बैठक लगत्तै उम्मेदवार घोषणा गर्ने तयारी गरेको छ ।
छनोट भएका आकांक्षीहरुमा पार्टी केन्द्रीय सदस्य कुसुम महर्जन, रुपन्देही–३ का क्षेत्रीय सभापति मधु अर्याल, अमेरिकाबाट हालै मात्र फर्किएका बुटवल सेमलारका सुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, कोटहीमाईका जीतबहादुर गुप्ता, रचना क्षेत्री र पुनम कुमारी अग्रवाल रहेका छन् ।
