काठमाडौँ । नेपाली काँग्रेसका सांसद आनन्दप्रसाद ढुंगानाले नेपालको भूमि लिपुलेक हुँदै व्यापार मार्ग खोल्ने चीन—भारतबीचको सम्झौता दुःखद् भएको बताउनुभएको छ ।
राष्ट्रिय सभाको शुक्रवारको बैठकमा बोल्दै उहाँले आपत्ति जनाउनुभएको हो । उहाँले चीनका विदेशमन्त्री भारतमा गएर नेपालको भूमि लिपुलेक, कालापानी, लिम्म्पियाधुरामा व्यापार मार्ग खोल्ने सम्झौता गर्नु नेपाल र नेपाली जनताका लागि दुःखद् भएको बताउनु भयो । उहाँले यसबारे सरकारले कुटनीतिक नोट लेख्नुपर्ने बताउनु भयो । नेपालको भूमिको प्रयोग नेपाललाई नसोधी गर्नेकुरा सह्या नहुने बताउनु भयो । प्रधानमन्त्री केपी शर्मा ओलीले निकट भविष्यमै चीन र भारतको भ्रम्ण गर्न लाग्नुभएको उल्लेख गर्दै कुटनीतिक तवरले समस्या समाधान गर्नुपर्ने बताउनु भयो ।
उहाँले भन्नुभयो, ‘हालै चीनका विदेशमन्त्री भारतमा गएर नेपालको भूमि लिपुलेक, कालापानी, लिम्म्पियाधुरामा व्यापार मार्ग खोल्ने सम्झौता गरे । यो नेपाल र नेपाली जनताका लागि धेरै नै दुःखद् कुरा हो । यसका बारेमा यो भन्दा पहिला पनि भारतका प्रधानमन्त्री र चीनका प्रधानमन्त्रीले यो लिपुलेक, लिम्पियाधुरा र कालापानीमा व्यापार सम्झौता गरेका थिए । तत्कालीन नेपालका प्रधानमन्त्री सुशील कोईरालाले नोट लेखेरै भारतलाई यो त्रिपक्षिय ठाउँ हो । यो नेपालको भूमि हो । नेपाललाई नसोधी जुन किसिमको सम्झौता गर्नुभयो, त्यसको विरोध गर्दछौँ भनेर भनेका कुराहरु अहिले पनि म बिर्सिन्न । नेपाल सरकारले आफ्नो नक्शा पनि निकालीसकेका छौँ, प्रधानमन्त्रीज्यु चीन पनि र भारत पनि जाँदै हुनुहुन्छ । आफ्ना कुराहरु कुटनीतिक तवरले राख्नुहोला ।’
सांसद ढुंगानाले नेपाली जनताले सोचेअनुसारको संघीयता देशमा चल्न नसकेको बताउनु भयो ।
