काठमाडौं । नेकपा (एमाले) का सचिव योगेश भट्टराईले आफ्नो पार्टीका सांसदहरूले खाली कागजमा हस्ताक्षर गरेको जनाएका छन् ।
संसदीय राजनीतिमा खाली कागजमा हस्ताक्षर गर्ने पुरानै चलन भएको बताउँदै उनले आवश्यकताअनुसार प्रयोग गरिने बताए ।
मंगलबार सिंहदरबारमा सञ्चारकर्मीहरूसँग कुरा गर्दै उनले भने , ‘यो कुनै ठूलो कुरा होइन। यो अहिलेदेखि हैन, पहिले ४८ सालदेखि नै चलेको चलन हो । हाम्रो जस्तो संसदीय अभ्यास भएका मुलुकहरुमा जहाँ पनि चल्छ ।’
पार्टीले आकस्मिक राजनीतिक परिस्थितिका लागि आफ्ना सांसदहरूको हस्ताक्षर पहिले नै लिएर राख्ने गरेको बताउदै उनले भने, ‘कुनै बेला अपर्झट प्रस्तावहरु दर्ता गर्नुपर्ने हुन्छ। त्यतिबेला माननीयहरु कोही विदेश गएका हुन्छन्, कोही काठमाडौं बाहिर हुन्छन् । त्यस्तो बेलामा प्रयोग गर्न पूर्वतयारीका लागि हस्ताक्षर लिएर राखिन्छ ।’
यस्तै, कांग्रेस र एमालेले एकैपटक हस्ताक्षर संकलन अभियान चलाएको र उपसभामुख हटाउन लागेको चर्चाबारे भट्टराईले यसमा सल्लाहले हस्ताक्षर गरेको नभई संयोगले एकै दिन परेको बताएका छन् ।
