गोरखा । नेपाली सेनाले नेपाल एकीकरण अभियानका क्रममा पृथ्वीनारायण शाहले गोरखादेखि काठमाडौँसम्म यात्रा गरेको पदमार्गमा पत्रयात्रा सुरु गरेको छ । बुधबार नेपाली सेनाको रिपुमर्दन गणको आयोजना तथा गोरखा नगरपालिका र भीमसेन थापा गाउँपालिकाको समन्वयमा पदयात्रा सुरु गरिएको हो ।
तेस्रोपटक सुरु गरिएको पत्रयात्रामा नेपाली सेनाका ४० जना सहभागी भएको गणपति हेमराज विष्टले जानकारी दिनुभयो । सो पत्रयात्रा पृथ्वी जयन्ती तथा राष्ट्रिय एकता दिवसको दिन पुस २७ गते हनुमानढोकामा आई टुङ्गिने छ । यसका लागि गोरखा दरबारस्थित हनुमान भञ्ज्याङबाट राष्ट्रिय झण्डा, सेनाको आफ्नै झण्डा र टर्च बोकेर सेनाको एउटा टोली काठमाडौतर्फ प्रस्थान गरेको छ ।
त्यहाँबाट जोर चौतारी, ताप्ले, अश्राङ, बोर्लाङ, बोर्लाङघाट हुँदै आज घाटबेसीसम्म हिँडेर सेना पुग्नेछ । घाटबेसीमा सो टोलीले धादिङको शिवदल गणलाई राष्ट्रिय झण्डा, सेनाको आफ्नै झण्डा र टर्च हस्तान्तरण गर्नेछ । शिवदल गणको टोलीले पदयात्रा गर्दै नुवाकोटको जबरजङ्ग गणको टोलीलाई ती सामग्री हस्तान्तरण गर्नेछ । जबरजङ्ग गणको टोली पुस २७ गते काठमाडौँ पुगेपछि पदयात्रा सकिनेछ ।
