काठमाडौं । पाठ्यक्रम विकास केन्द्रले कक्षा ९ को अनिवार्य नेपाली विषयको पाठ्यपुस्तकमा रहेको गीतसम्बन्धी एउटा त्रुटी सच्चाएको छ । सामाजिक सञ्जालमा तीव्र विरोध र आलोचना भएपछि पाठ्यक्रम विकास केन्द्रले त्रुटि सच्याइएको हो ।
चर्चित गीत ‘यसपालि त मनै फाट्यो, केले सिउने केले टाल्ने’ को रचनाकारको नाममा रहेको त्रुटी सच्याइएको हो । केन्द्रले बुधबार एक सूचना जारी गर्दै सो गीतका रचनाकार अम्बर गुरुङ नभई राजेन्द्र थापा भएको बताएको हो ।
केन्द्रले सच्याइएअनुसारकै विवरणका आधारमा शिक्षण–सिकाइ क्रियाकलाप गर्न/गराउनसमेत सम्पूर्ण शिक्षण संस्थाहरूलाई आग्रह गरेको छ ।
कक्षा ९ को अनिवार्य नेपाली विषयअन्तर्गत पाठ ५ को पृष्ठ ५४ मा रहेको ‘बोध र अभिव्यक्ति’ खण्डको अभ्यास १३ मा उक्त गीतको रचनाकार अम्बर गुरुङ भनेर उल्लेख थियो ।
यसअघि पाठ्यपुस्तकमा सोही गलत विवरणका आधारमा पठनपाठन हुँदै आएको थियो । सामाजिक संजालमा यो त्रुटीको लामो समयदेखि विरोध हुँदै आएको थियो ।
